Cumaaqşamı künü, noyabrniñ 26-nda, Rusiyeniñ Rostov-na-Donu şeerindeki Cenübiy okrugınıñ arbiy mahkemesi qırımlı Zekirya Muratovnıñ apiste qaluv müddetini 6 ayğa – 2021 senesi mayısnıñ 17-ne qadar uzattı. Bu aqta advokat Lilâ Gemeci «Qırım birdemligine» bildirdi.
Onıñ aytqanına köre, Muratovnıñ davası boyunca ilk tahqiqat yekünlendi, oña qabaatlayıcı qarar berildi. Gemeci, mahkeme diqqatını Muratovnıñ 3-ünci derece saqatı olğanına, kiçkene balası olğanına ve onıq baqıluvına aliment bergenine celp etti.
Gemeciniñ bildirgenine köre, al-azırda Zekirya Muratov karantin kamerasında buluna, anda Aqmescitteki ekinci «Hizb ut-Tahrir davasınıñ» mabüsi Riza İzetov da buluna. Mahkeme vaqtında Muratov toqtamayıp öksürdi.
«Şimdi karantin kamerasında buluna, bu sağlığına pek tesir ete. Dünya sağlıq teşkilâtınıñ tevsiyelerine baqıp, koronavirus pandemiyası vaqtında onı ev apsinde tutmaq doğru olur edi. Pasportları alındı, içtimaiy bağları Qırımda, çetel devletlerinde Muratovnıñ mülki yoq, tahqiqat ve mahkemeden saqlanmağa tırışmağan edi. Cinayet ağırlığı insannı apiste tutmaq içün sebep degil», – dedi advokat Gemeci.
Rusiye kontrolindeki Qırım Yuqarı mahkemesi imayeniñ istinaf şikâyetini qanaatlendirmeyip, qırımtatarı Zekirya Muratovnı tahqiqat izolâtorında qaldırğan edi.
Rusiye quvetçileri Zekirya Muratovnı iyülniñ 7-nde tuttı. FSB, onı «Hizb ut-Tahrir» bölüginde iştirak etkeninde qabaatlay.
Rusiye quvetçileriniñ areketlerini Ukraina prezidentiniñ Qırım Muhtar Cumhuriyetindeki daimiy temsilciligi takbih etti, Qırım Muhtar Cumhuriyeti ve Aqyardaki Milliy politsiya Baş idaresi tintüvler aqqında Ukraina Ceza kodeksiniñ 162-nci maddesiniñ 2-nci qısmına (mesken tiyilmemezligini bozuv) ve Ukraina Ceza kodeksiniñ 146-ncı maddesiniñ 2-nci qısmına (qanunsız alda azatlıqtan marum etüv) istinaden cinaiy tahqiqat başlattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
