Martnıñ 11-nde Rostov-na-Donudaki Cenübiy bölgeniñ arbiy mahkemesinde üçünci Bağçasaray «Hizb utr-Tahrir davası» boyunca mahkeme oturışında qabaatlav tarafınıñ gizili şaatını sorğuğa çektiler.
«Qırım birdemligi» cemaat birleşmesiniñ haber etkenine köre, mahkeme oturışına jurnalistlerni ve mabüslerniñ aqrabalarını yibermegenler.
«Bağ pek yaramay edi, akisseda eşitile edi, sesi de deñiştirilgen edi. Kerimov şartlı isminen şaat, mahkemelengenler yasaq etilgen edebiyatnı ögrenmege teklif etkenlerini prokurorğa ayttı. Advokatlarnıñ suallerine kerekli kibi cevap bermedi ve davağa alâqası olmağı içün mudafaa tarafınıñ sualine cevap bermekten red etmege istegenini ayttı», – dep yazıla bildirmede.
Birleşmeniñ malümatına köre, mahkemelengenler şaatnı bilmegenlerini ayttılar. Bundan ğayrı, bu insan evel ekinci Bağçasaary «Hizb ut-Tahrir davası» boyunca şaatlıq etken edi, dep qayd ettiler.
«Mudafaa tarafı gizli şaat kim olğanını bildirilmesini istedi, mahkeme ise red etti», – dep qayd etile beyanatta.
2020 senesi martnıñ 11-nde Bağçasarayda bir qaç qırımtatarınıñ evi tintildi: Enver Mustafayev, Amet Suleymanov, ağa-qardaş Seytumer ve Osman Seytumerovlar ve emceleri Rustem Seytmemetovnıñ. Tintüv «Qırım birdemliginiñ» sabıq faali Seytumer Seytumerovnıñ evinde de keçirildi. O, bir qaç yıl evelsi Qırımnı terk etti.
Enver Mustafayev sorğudan soñ yiberildi. Seytumer Seytumerov (d.s. 1988), Amet Suleymanov (d.s. 1984), Rustem Seytmemetov (d.s. 1973), Osman Seytumerov (d.s. 1992) Rusiye Ceza kodeksiniñ 205.5 maddesiniñ ekinci qısmına istinaden (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv) qabaatlana. 2018 senesinden berli Qırımda olmağan Seytumer Seytumerov Rusiye Ceza kodeksiniñ 205.5 maddesiniñ birinci qısmına istinaden qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
