Martnıñ 28-nde yağğan yağmurlar Özbekistannıñ bir qaç rayonında suv basuvınıñ sebebi oldı, eñ çoq Samarqand ve Navoiy vilâyetleri zarar kördi, dep bildire Azatlıq Radiosınıñ özbek hızmeti.
İçtimaiy ağlarda Samarqand vilâyetiniñ Kattakurgan, Payariq, Paxtachi ve Qoʻshrabot rayonlarında yıqıluvlar aqqında haber etile. Paxtachi rayonında bu künleri açılğan köpür omradı, areket toqtatıldı.
Kattakurgan rayonınıñ Oltinsoy, Carboşi ve Moybulak köylerinde evlerni suv bastı, suv maşinalarnı bile alıp kete edi. Samarqand vilâyetiniñ memuriyeti ve Fevqulâde vaziyetler nazirligi suv basuvınıñ aqibetleri aqqında resmiy malümat bermeyler.
Navoiy vilâyetiniñ akimiyeti, Karmana rayonında 21 azbarnı ve Xatirchi rayonında 15 azbarnı suv bastı, Navoiydeki merkeziy çiftlik bazarında ise suv toplandı. Fevqulâde vaziyetniñ aqibetlerini yoq etmek içün 14 maşina ve fevqulâde vaziyetler idaresiniñ 72 hadimi celp etildi.
Olarnıñ malümatına köre, suv basuvı vaqtında kimse yaralanmadı ve elâk olmadı.
Buharada da yağğan yağmurlar neticesinde soqaqlarnı ve evlerni suv bastı.
