Martnıñ 15-nde Frenkistandan qaytqan Özbekistan vatandaşınıñ Covid-19 koronavirusı qayd etildi. Bu aqta memleketniñ Sağlıq nazirligi yanındaki sanitar-epidemiologik agentligine esaslanıp Azatlıq Radiosı haber ete.
«Al-azırda epidemiologik tedqiqatlar yapıla ve hastalıqnıñ tarqaluvına yol bermemek içün profilaktika tedbirleri alına», – dep aytıla agentlikniñ matbuat haberinde.
Daa evel Özbekistan akimiyeti Frenkistan, İspaniya, Büyük Britaniya, İran, Yaponiya, Afğanistan, İtaliya ve Cenübiy Koreya ile uçaq seferlerini toqtatqan edi. Böyle tedbirler virusnıñ tarqaluvına yol bermemek içün martnıñ 14-nden başlap işke tüşürildi.
Özbekistan – koronavirus hastaları qayd etilgen Orta Asiyanıñ beş memleketinden ekincisidir. Daa evel Qazahistanda ilk COVID-2019 hastaları qayd etildi. Bugünge qadar Qazahistanda 8 hasta bar.
Martnıñ 15-ne qadar koronavirus hastaları 142 devlette qayd etildi, hastalarnıñ umumiy sayısı 153 biñni aştı. Qurbanlarnıñ sayısı – 5833 insan.
