Özbekistanda daa evel blok etilgen yerli ve çetel kütleviy haber vastalarınıñ saytları açıldı. Bu aqta Özbekistan prezidentiniñ memuriyeti yanındaki Malümat ve kütleviy bağ agentliginiñ müdiri Komil Allamjonov Facebookta yazdı.
Memurnıñ aytqanına köre, saytlarnıñ blok etilüvini «tehnik hatalarnen» bağlı edi, dep bildire «Nastoyaşçeye vremâ» telekanalı.
«Tedqiqat neticesinde bu web-saifelerniñ Özbekistandaki işine keder etken belli tehnik hatalar qayd etildi, olarnı al etmek içün kerekli tedbirler alındı. Bugünden başlap Voice of America, Amerika ovozi, BBC Uzbek, Deutsche Welle, Amnesty International, Human Rights Watch, Reporters sans frontieres, Eurasianet.org, AsiaTerra, Fergana Agency, Centre1, Uzmetronom ve diger çetel saytları açılacaq», – dep aytıla Allamjonovnıñ beyanatında.
Azatlıq Radiosınıñ özbek bürosı qayd etilgen resurslar arasında yoq.
Memur yapqan beyanatında OSCE kütleviy haber vastalarınıñ serbestligi meseleleri vekili Arlem Dezirge esaslandı. O, aprel ayında Özbekistan akimiyetini haber saytlarınıñ blokunı alıp taşlamasına çağırğan edi.
