Cumaaqşamı künü, yanvarniñ 9-nda, Rostov-na-Donu Cenübiy okrugınıñ arbiy mahkemesinde «Hizb ut-Tahrir davasınıñ» (Qurman gruppası) temelini baqacaq ilk oturışuv başlanmalı. Bu davanıñ üç mabüsi bar, olarnı terrorizmde qabaatlaylar.
«Müvekkilim Emiruseinov Rustem ömür boyu apiske alınması mümkün. Arsen Abhairov ve Eskender Abdulganiyev 20 yılğa azatlıqtan marum etilmeleri mümkün! Rustem «Musulmanlar terrorist degildir» yazuvlı şiarınen çıqqan edi ve bugün onı terrorizmde qabaatlaylar», – dep yazdı advokat Emil Kurbedinov Facebookta.
Daa evel advokat Edem Semedlâyev, dava mabüsleri oturışuvda Aqmescitten video bağı vastasınen iştirak etecek, dep bildirdi.
2019 senesi dekabr ayında Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davası» mabüslerini 2020 senesi iyünniñ 13-ne qadar apiste qaldırdı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
