Ukraina Yuqarı Radasınıñ insan aqları vekâletlisi Lüdmila Denisova halqara teşkilâtlarnıñ vekillerini Rusiye apishanelerinde tutulğan qırımlılarnıñ aqları bozulğanına cevap bermelerine çağıra.
«BM insan aqları Yuqarı Komissarı Mişel Baçelet, OSCE reisi Miroslav Layçak, Avropa Şurasınıñ insan aqları komissarı Dunâ Miyatoviç ve bütün diplomatik missiyalarnıñ vekillerini Ukraina vatandaşlarınıñ aqları bozulğanına cevap bermek içün elinde olğan bütün mehanizm, imkân, vekâlet, resurslarnı qullanmasına ve olarnıñ sağlığı içün qaytarılmaz aqibetlerden ve bazılarını ölümden qurtarmalarına çağıram», – dep yazdı Denisova Facebookta.
O, sağlığı onı pek qasevetlendirgen qırımlı mabüslerni qayd etti.
«Rustem Şeyhaliyev, Vladlen Abdulkadırov psihiatrik hastahanege yatqızıldı, Oleg Prıhodko dünyadan ayırıldı, Tofik Abdulgaziyev ve Cemil Gafarov SİZOda ölümge qaldırıldı», – dep yazdı Denisova.
Bu teşkilâtlar şimdilik cevap bermedi.
Denisova, Rusiyede apiske alınğan qırımlı Ayder Cepparovnıñ betinde şişik çıqqanını, Aqmescit SİZOsında Tofik Abdulgaziyevniñ qanı zeerlendi, dep bildirgen edi. Ukraina ombudsmeniniñ malümatına köre, Rostov SİZOsında hasta Alim Karimovğa da tibbiy yardım kösterilmey.
Denisova, Rusiye İnsan aqları vekâletlisi Tatyana Moskalkovağa muracaat etip, «acele tedbir almasına» ve qırımlı nabüslerge «tolu tibbiy tedqiq ve ihtisasiy tedaviylev yapılmasını temin etmesine» çağırdı. Rusiye ombudsmeni alâ daa cevap bermedi.
Denisova, Rusiyede apiste tutulğan ukrainalı siyasiy mabüslerniñ farqlı sayısını aydınlatqan edi: 113-ten 115-ke qadar, olardan 80-den çoqu – qırımtatarlardır. Qırımtatar resurs merkeziniñ cedvelinde 86 qırımlı siyasiy mabüs bar.
Deñişimni beklegen qırımlılarnıñ ekseriyeti – qırımtatarlar, olar bir sıra davalarnıñ, hususan «Hizb ut-Tahrir», «Tebliğ Cemaatı» davalarınıñ (Rusiyede yasaqlanğan, amma Ukrainada yasağı olmağan teşkilâtlar) mabüsleri ola. Aq qorçalayıcılar ve advokatlar bu cinaiy davalarnı diniy sebeplerden taqip dep adlandıra. Bu davalarnıñ mabüsleri – din kütken musulmanlardır.
Rusiye Tış işler naziri Sergey Lavrov, işğal etilgen Qırımda insan aqları bozulğanına dair laflar uydurıla, dep bildirgen edi.
