Qırımnıñ Gidromettsentr gidrologiya ve gidrologik tahminler bölüginiñ reberi Natalya Ohrimenko bildirgenine köre, yağanaqlarğa baqmadan, Qırımnıñ suv anbarlarındaki vaziyet eyilişmey. Onıñ aytqanına köre, bütün suv anbarları şimdi «ölü seviyeden az».
«Suvımız yetmey. Suv anbarları suv anbarlarına da oşamay, ot ve çalılar bastı, gidrotehnik inşaatlar telükege oğratıla. Bütün suv anbarları şimdi ölü seviyeden az, yani 30% az. 4%, 5%, 6% (tolulıq seviyesi – muar.) olğanlar da bar», – dep tarif etti «RİA Novosti Krım» agentligine Ohrimenko.
Onıñ bildirgenine köre, şimdilik tek Qazıqlı-Özende vaziyet eyileşti, amma ciddiy deñişmeler yoq.
«Qara özen suv anbarı üstündeki Qazıqlı-Özen dekabrniñ 30-nda künniñ ekinci yarısında «uyandı». Amma pek az. Suv keldi dep aytıp olamaymız, amma bu da müsbet vaziyet. Umumen, ciddiy bir artuv olmadı», – dedi Ohrimenko.
Qırımdaki Gidromettsentrniñ soñki malümatına köre, 2020 senesi dekabr ayında Qırımnıñ Partizan ve Qara özen suv yedeklerine suv kelmedi, Aluşta, Sudaq ve Kefeniñ köy özenleriniñ çoqusı qurudı.
Qırımnıñ mesken-kommunal hocalıq nazirligi dekabr ayında Qırımnıñ suv anbarlarınıñ tolmasına dair statistik malümatlar derc etti. Aydınlatılğan malümatqa köre, yarımadanıñ eñ az beş suv anbarı «ölü miqdar» işaretine yaqın.
Rusiye prezidenti Vladimir Putinniñ fikirince, Qırımda tatlı suv yete. Onıñ aytqanına köre, Qırımğa yaqın suvlarda, Azaq deñizi altında yedekler bar.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
