Rusiye kontrolindeki Qırım Yuqarı mahkemesinde Qırımtatar Milliy Meclisiniñ reisi Refat Çubarovğa qarşı cinaiy dava boyunca daa bir oturışuv oldı. Bu aqta tayin etilgen advokat Aleksandr Osokin Qırım.Aqiqatqa bildirdi.
Onıñ aytqanına köre, avgustnıñ 21-nde olğan oturışuvda beş kişi sorğuğa çekildi. Qadı tatilge ketkeni içün nevbetteki oturışuv oktâbrniñ 12-ne belgilendi. Şaatlarnıñ sorğuğa çekilmesi planlaştırıla.
«Krım 24» telekanalınıñ bildirgenine köre, keçken oturışuvda sekiz insan 2014 senesi fevralniñ 26-nda Qırım Muhtar Cumhuriyetiniñ Yuqarı Şurası ögünde Ukraina topraq bütünliginiñ tarafdarları ve qarşı çıqqanlarınıñ büyük mitingi boyunca şaatlıq etti.
Advokat Nikolay Polozovnıñ bildirgenine köre, Qırımdaki mahkeme oña Refat Çubarovnı qorçalamağa izin bermegen soñ qabaatlav tarafınıñ eñ az 16 zarar körgen kişisini ve şaatını sorğuğa çekti.
Aqmescitte iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
Bu sene mart ayınıñ soñunda Rusiye Tahqiqat komiteti Qırımtatar Milliy Meclisiniñ reisi Refat Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212 maddesiniñ 1-inci qısmı (qalabalıqlarnı teşkil etüv), 280.1 maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq faaliyetke açıq çağıruv) açıldı.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
