Advokat Nikolay Polozov, Qırımtatar Milliy Meclisiniñ reisi Refat Çubarovnıñ Qırım davasında imaye olamağanı içün Rusiye kontrolindeki Qırım Yuqarı mahkemesinden oña Rusiye umumiy adliye Üçünci istinaf mahkemesine (Soçi) şikâyet etmege imkân bergen vesiqanı aldı, dep bildirdi.
«Bugün Qırım Yuqarı mahkemesi ilk diñlevler protokolından maña bir parça berdi, anda mahkemeniñ maña mahkeme tahqiqatında Refat Çubarovnıñ imayesini yapmağa izin berilmey», – dep bildirdi Polozov Facebookta.
Onıñ aytqanına köre, bu istinaf qurulışına qararğa qarşı şikâyet bermek içün yetmegen soñki vesiqa edi.
«Bütün manialar yeñildi, bu istinaf şikâyetini birden berdim. Soçi istinaf qurulışınıñ qadıları qanun normalarına ne qadar riayet etkenine baqacaqmız. Qırımda, ne yazıq ki, bu pek qıyın», – dedi advokat.
Aqmescitte iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
Bu sene mart ayınıñ soñunda Rusiye Tahqiqat komiteti Qırımtatar Milliy Meclisiniñ reisi Refat Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212 maddesiniñ 1-inci qısmı (qalabalıqlarnı teşkil etüv), 280.1 maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq faaliyetke açıq çağıruv) açıldı.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Aktsiya mayısnıñ 3-nde keçirilecek edi. Koronavirus pandemiyası sebebinden yürüş başqa vaqıtqa qaldırıldı.
