Qırımtatar Milliy Meclisiniñ reisi, Ukraina halq deputatı Refat Çubarov Ukraina akimiyetini «Rusiye quvetçileri tarafından qırımtatarlarnıñ evlerinde tintüvler keçirilgen, Rusiye mahkemeleri tarafından qırımlılarğa uzun apis cezaları berilgen» işğal etilgen Qırımdaki vaziyetten sebep BM Havfsızlıq şurası acele toplaşuvınıñ teşebbüsçisi olmağa çağıra.
«Evelki qararlarnıñ Rusiye tarafından yerine ketirilmemesi sebebinden Ukraina akimiyeti, Ukraina Tış işler naziri, yañı saylanğan prezidentni BM Havfsızlıq şurası acele toplaşuvınıñ teşebbüsçisi olmağa çağırmağa isteyim: BM Baş Assambleyası, BM halqara mahkemesiniñ Qırımtatar Milliy Meclisiniñ faaliyetini yasaq qararınıñ lâğu etilmesinen bağlı eki yıl evelsi qabul etilgen qararları, deñiz mahkemesiniñ qararı, Avropa insan aqları mahkemesiniñ Edem Bekirovnen bağlı qararı yerine ketirilmedi. BM Havfsızlıq şurası acele toplaşıp, qırımtatar halqına, vaqtınca işğal etilgen Qırım toprağında yaşağan Ukraina vatandaşlarına telükesizlik kefillerini berüv meselesini muzakere etmek kerek», – dedi Çubarov Facebooktaki video muracaatında.
Onıñ fikirince, BM Havfsızlıq şurasınıñ toplaşuvı eñ yaqın künlerde keçirilmeli.
«Aks alda Rusiyeni toqtatıp olamamız ve qırımtatar halqını onıñnen qaldırırmız. Bu yañlış olur, böyle bir şey olamaz», – dep qayd etti Çubarov.
Çubarov iyünniñ 19-nda Qarasuvbazar rayonınıñ Sarı-Su köyündeki eki evde keçirilgen tintüvlerni izaatlap, işğal etilgen Qırımda «qırımtatarlarğa qarşı total tarama devam ete».
2017 senesi Qırımnıñ Rusiye baş nazir muavini Georgiy Muradov BM insan aqları monitoring missiyasınıñ «Qırımnı bir qaç kere ziyaret etmege imkânı bar edi, amma formal sebeplerden vazgeçken ediler», dep bildirgen edi.
2019 senesi mart ayında BM Ukrainadaki insan aqları missiyasınıñ reisi Fiona Freyzer Rusiye ilhaq etilgen Qırımda fikir ve tenqit serbestligini basmağa devam ete, dep bildirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
