Qırımtatar Milliy Meclisiniñ reisi Refat Çubarov salı künü, noyabrniñ 12-nde, Rostov mahkemesinde Yaltadaki «Hizb ut-Tahrir davasınıñ» mabüslerine çıqarılacaq üküm sebebinden Ukraina ve işğal etilgen Qırım sakinlerine muracaat etti.
O, yarımada sakinlerinden er biri bunıñ kibi esnasqa oğraması mümkün, dep qayd etti.
«Özüni aldatmañız. Olar sizge, bugün evde tınç oturıp, evleriniñ tintüvi, apis cezalarından qorunğanını tüşüngenlerge, mıtlaq kelecekler. Rus işğalciler insanlarnı qabaatlı olğanları içün degil, qırımtatarları olğanı içün mahküm ete. Olar qalğan qırımtatarlarnı ve etnik ukrainlerni, Rusiye işğalini qabul etmegenlerni qorquzmaq içün mahkeme ete», – dep ayttı Çubarov video muracaatında.
Onıñ fikirince, bunıñ kibi mahkeme esnasları «insanlarnı ileride Qırımnı terk etmeleri içün qorquza».
Çubarov, qırımlılarnı mahkümlerniñ tuvğanlarına yardım etmelerine çağırdı.
Rusiye prokurorları Yaltadaki «Hizb ut-Tahrir davasınıñ» altı mabüsi içün umumen 98,8 yıl apis cezası berilmesini istedi. Muslim Aliyev 20 yılğa, İnver Bekirov 20,6 yılğa, Emir-Usein Kuku 15 yılğa, Vadim Siruk 15 yılğa, Arsen Cepparov 13,6 yılğa, Refat Alimov 14,6 yılğa apiske alına bile.
Rostov-na-Donu şeeriniñ Cenübiy okrug arbiy mahkemesinde noyabrniñ 8-nde mabüsler soñki sözüni ayttı.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
Ukraina Tış işler nazirligi Rusiyeden Yaltadaki «Hizb ut-Tahrir davasınıñ» mabüslerini azat etmesini talap ete.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
