Qırımlı jurnalist Şevket Namatullayev işğal etilgen Qırımda Rusiye uquq qoruyıcıları tarafından tutulğan ve siyasiy sebeplerden apiske alınğan qırımtatar faalleriniñ balalarına yardım etmek içün para toplamağa teklif etti. Bu aqta Qırımtatar Milliy Meclisiniñ reisi Refat Çubarov martnıñ 28-nde bildirdi.
«İşğalci uquq qoruyıcılarnıñ tünevin saba qırımtatarlarğa yapqan taramasından soñ 55 bala babasız qaldı! 55 bala bir sabada baba vasiyligisiz qaldı! Şimdi Qırımda babasız qalğan siyasiy mabüslerniñ qorantalarından balalarnıñ sayısı 116 + 55 = 171 oldı», – dep yazdı Çubarov Facebookta.
Onıñ hatırlatqanına köre, Rusiye uquq qoruyıcıları 27 qırımtatar faaliniñ evinde tintüv keçirdi.
«Rusiyeniñ Qırım işğalinen küreşmege devam etken qırımtatarlarğa birdemlik köstereyik», – dep qayd etti Çubarov.
Rusiyeniñ Qırım ilhaqından soñ yarımadada ana-babaları siyasiy sebeplerden apiske alınğan 100-den ziyade qırımla balağa yardım etken «Bizim balalar» hayriye fondunı qurulğan edi.
Rusiye kontrolindeki Aqmescitniñ Kiyev rayon mahkemesi martnıñ 28-nde Rusiyeniñ Rostov-na-Donu şeerinde Rusiyede yasaqlanğan «Hizb ut-Tahrir» teşkilâtınıñ faaliyetine alâqaları bar olğanından şübheli sayılıp tutulğan «Qırım birdemligi» cemaat teşkilâtınıñ üç faalini apiske aldı.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde Aqmescitniñ Kiyev rayon mahkemesi tutulğan doquz qırımtatar faalini tevqif etti. Martnıñ 28-nde Aqmescitniñ rayon mahkemesi martnıñ 27-nde Rusiye uquq qoruyıcıları tarafından tutulğanlardan 14 qırımtatar faalini apiske aldı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
