Moskva Ukraina topraq bütünligi ve devlet sıñırlarına qoltutqan dünya devletleriniñ birdemligini, hususan Türkiyeniñ Qırım işğalinen bağlı qararlarını bozmağa tırışa.
Bu aqta Qırımtatar Milliy Meclisiniñ reisi, Ukraina halq deputatı Refat Çubarov Facebook saifesinde yazdı.
«Türkiye reberligini Qırım fikirlerini yımşatmasına qandırmaq Moskva içün pek müim ola. Moskva, hususan Rusiye Tış işler nazirligi, qullanğan bir sıra ayneci usullar arasında soñki bir-bir buçuq yıl devamında Türkiyede «qırımtatar medeniyetini tanıtma künlerini» keçirmesi bar», – dep yazdı siyasetçi.
Çubarovnıñ bildirgenine köre, Moskva Qırımdaki «Rusiye işğalci akimiyetiniñ qanunsız organlarını», Türkiye tarafından ise Ankarada qayd olğan ve Rusiye tarafından desteklengen «Kırım kalkınma vaqfını» ögge sürecek ola».
«Moskvanıñ evelki eki ıntıluvını Ankara red etken edi. Şimdi Moskva üçünci ıntıluvğa başladı», – dedi Çubarov.
O, «Rusiye diplomatiyasında olğan menbalardan» Ukraina tarafından alğan vesiqalarnı aydınlattı.
Türkiye Ukraina topraq bütünligi ve devlet sıñırlarına qoltutıp, Rusiyeniñ Qırım işğalini tanımay. Bu aqta Türkiye Tış işler naziriniñ muavini Yavuz Selim Kıran2018 senesi sentâbr ayında Ankarada Ukraina-Türkiye diplomatik munasebetleriniñ 100 yıllığına bağışlanğan konferentsiyada aytqan edi.
2016 senesi avgustnıñ 20-nde Türkiye Cumhuriyeti prezidenti Recep Tayyip Erdoğan Ukraina prezidenti Petro Poroşenko ile telefonda laf etip, Ukraina topraq bütünligine qoltutmağa devam etkenlerini qayd etken edi. Türkiye prezidenti, Türkiye Cumhuriyeti Qırım işğalini tanımaycaq ve qırımtatarlarğa qoltutmağa devam etecek, degen edi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
