Qırımtatar Milliy Meclisiniñ reisi Refat Çubarov, Rusiye FSBsiniñ sıñır idaresi Qırımdan esas Ukrainağa yibermegen sabıq dissident Oleg Sofânik etrafındaki vaziyetni izaatladı.
«Qırımda onıñ sakinlerini «qapatqan» Rusiye işğalci akimiyetiniñ Herson vilâyetine çıqmalarını yasaqlağanını köstergen ilk adise degildir», – dep yazdı Çubarov Facebookta.
Sofânikniñ Qırım.Aqiqatqa bildirgenine köre, «işğalci akimiyet tarafından zorlap berilgen» Rusiye pasportı sebebinden onı çıqarmadılar.
Rusiye FSBsi Sofânikniñ Qırımdan çıquv yasağını açıq sürette izaatlamay.
2019 senesi noyabrniñ 14-nde Rusiye quvetçileri Oleg Sofânikni Qırım ve Herson vilâyetiniñ memuriy sıñırında tuttı. Bundan evel o, Lukull limanından (Qırımnıñ ğarbinde) Aqyardaki Omega körfezine yaldadı. 30 km mesafeni 10 saat içinde yaldadı – raatlanmayıp ve bir özü olıp. Bunı Sofânik qırımtatar sürgünliginiñ 75 yılına bağışladı.
Oleg Sofânik – meşur aqyarlı yaldayıcı marafoncı, Ukraina rekordları kitabınıñ rekordçısıdır. 2012 senesi mayıs ayına qadar Sofânik 50 marafonda yaldadı, eñ uzunı 350 km Cenübiy-Qıtay deñizinden edi.
Sofânik Aq deñiz, Marmara deñizi, İstanbul boğazını, Çanaqqale boğazını yaldap keçti. Qırım yalısında 100 kilometrge qadar marafonlarda iştirak etti. Qışta suvuq suvda da yaldağanınen bellidir.
Aqyarlı dissident ola. Askerlikten ve Sovetler Birliginiñ vatandaşlığından vazgeçkeni içün onı psihiatrik tedaviylevge mecbur etken ediler.
