Qırımtatar Milliy Meclisi reisi Refat Çubarov, avgustnıñ 9-nda başlanğan Rusiye arbiy talimleriniñ em Ukraina qıtasına yañı bir tecavuzdır, em de Qırım sakinlerine telüke yarata, dep saya. Bunı o, Qırım.Aqiqatqa bildirdi.
«Aman-aman bütün ordu türleriniñ ve çoq miqdarda rus işğal ordusınıñ şahsiy eyyetiniñ iştiragi ile Qırımda keçirilgen er angi bir talim, Rusiyeniñ Ukraina qıtasına tecavuzınıñ keñişlenmesi ve Qırımdaki vatandaşlar içün bir tehdittir. RF-nıñ işğal etilgen Qırım topraqlarında er angi bir provokatsiyalarınıñ, ilk nevbette milletine baqmadan vatandaşlar içün aqibetleri olacaq», – dep qayd etti Çubarov.
Rusiye ordusı bazarertesi künü, avgustnıñ 9-nda, Qırımda büyük arbiy talimlerni başlata. O, sentâbrniñ 15-ne qadar devam etecek. Talimler tek işğal etilgen yarımadada degil, Rusiyeniñ Astrahan ve Rostov vilâyetlerinde, Stavropol ve Kubanda, Adıgeya, Dağıstan, Şimaliy Ösetiya, Çeçenistan, Ermenistan ve Gürcistannıñ separatist regionları – Abhaziya ve Cenübiy Ösetiyadaki arbiy bazalarda yerleşken 20 poligonda keçecek.
2014 senesi Qırım işğal etilgen soñ Rusiye yarımadada ve Qara deñizde arbiy talimlerni muntazam sürette keçire, arbiy tehnika, hususan duşman aviatsiyası ile küreş sistemasını ketire. Ukraina ve Ğarp Moskvanıñ bu adımlarını takbih etti.
Qırımnıñ askeriyleştirilüvi
2014 senesi Qırım işğal etilgen soñ Rusiye yarımadada ve Qara deñizde muntazam sürette arbiy talimler keçire, arbiy tehnikanı, hususan uçaqquvar mudafaa sistemasını ketirip qoya.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda ise Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
Ukraina Baş ştabı, Rusiye arbiyleriniñ Qırımda yapqanlarını qanunsız dep adlandıra.
Ukrainanıñ BM daimiy vekiliniñ muavini Yuriy Vitrenko, Rusiye yarımadada nükleer silâsını yerleştirgeninden qorqqanını bildirdi. Ukraina Milliy telükesizlik ve mudafaa şurasınıñ kâtip muavini Serğiy Krıvonis, Qırımda nükleer silâsı olması mümkün bir qaç yer bar, dep bildirdi. Onıñ fikirince, onıñ yarımadada yerleştirilüv ihtimali «ğayet büyüktir».
2020 senesi dekabr ayında Kreml temsilcisi Dmitriy Peskov Rusiyeniñ Qırımda «telükesizligi içün er şey yapmağa aqqı bar», dep bildirgen edi.
BM Baş Assambleyası 2019 senesi dekabr ayında Rusiyeni işğal etilgen Qırımdan ordusını çıqarmasına ve Ukraina topraqlarınıñ vaqtınca işğalini toqtatmasına çağırğan qararnı qabul etti.
