Qırımtatar Milliy Meclisiniñ reisi Refat Çubarov Rusiye quvetçileriniñ avgustnıñ 17-nde Qırımda keçirgen yañı tintüvleri aqqında fikrini ayttı.
«Avgustnıñ 23-ü "Qırım platfomrasınıñ" işi başlaması ile Qırımdaki rus işğalciler hışımğa keleler. Tünevin, avgustnıñ 16-nda, RF Cenübiy bölgesiniñ arbiy mahkemesi dört qırımtatarnı umumen 61 yıl apis cezası berdi (18, 12, 13, 18 yıl). Bugün, avgustnıñ 17-nde, Aqmescit, Bağçasaray rayonlarında ve Aqyar yaqınlarındaka köylerde işğalciler qırımtatarlarnıñ evlerinde tintüvler keçirip, beş kişini yaqaladı», – dep yazdı Çubarov Facebookta.
«Qırım birdemligi» cemaat birleşmesiniñ faalleri, avgustnıñ 17-nde saba qırımtatrlarnıñ evlerinde keçirilgen tintüvlerden soñ beş insan yaqalanğanını bildireler.
Aqyarnıñ Nahimov rayonında FSB hadimleri Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyevni yaqaladı.
Faallerniñ malümatına köre, Cebbar Bekirov, Zaur Abdullayev ve Rustem Tairovnıñ evlerinde tintüvler Aqyarnnı Lenino rayon mahkemesiniñ qararı ile keçirildi.
Raif Fevziyevniñ evinde keçirilgen tintüvge avdokat Edem Semedlâyevni yibermegenler. Advokatnıñ malümatına köre, imam Rusiye CQ 205.5 maddesine binaen qabaatlana.
Ukraina Tış işler naziriniñ birinci muavini Emine Ceppar avgustnıñ 17-nde qırımtatarlarnıñ evlerinde keçirilgen tintüvlerge cevap berdi. O buña devam etken «qorqutuv siyaseti» dedi.
Ukraina Yuqarı Radasınıñ insan aqları vekâletlisi Lüdmila Denisova, avgustnıñ 17-nde qırımtatarlarnıñ evlerinde keçirilgen tintüvlerge qarşılıq kösterdi.
Ukraina prezidenti Volodımır Zelenskıy, Rusiye telükesizlik quvetleriniñ avgustnıñ 17-nde yarımadanıñ türlü köşelerinde qırımtatarlarnıñ evlerinde keçirgen tintüvlerge "insan aqlarınıñ qaba şekilde bozuluvı"dedi.
Ukraina TİN, avgustnıñ 17-nde yarımadanıñ türlü köşelerinde qırımtatarlarnıñ evlerinde Rusiye telükesizlik quvetleriniñ keçirgen tintüvlerine qarşı qatiy narazılıq bildirdi. Olarnıñ fikrince, bunıñ sebebi avgustnıñ 23-ne planlaştırılğan «Qırım platforması» sammitidir
Aqyar ve Aqyamecit mahkemeleri avgustnıñ 17-nde qırımtatarlarnıñ evlerinde keçirilgen tintüvlernden soñ yaqanğan beş kişiden üçüne sıñırlama tedbiri sayladı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
