Link açıqlığı

Saatnıñ esas haberi

Çubarov: Rusiye qırımtatar halqını tarihtan alıp taşlamağa tırışa


Refat Çubarov
Refat Çubarov

Qırımtatar Milliy Meclisiniñ reisi Refat Çubarov Rusiye qırımtatarlarnı tarihtan alıp taşlamağa tırışa, dep tahmin ete. Böyle bir fikirni o, mayısnıñ 7-nde Kyivde «Rusiye imperializmi» ceetinden Qırım muzakere etilgen tögerek masada bildirdi, dep haber ete Qırım.Aqiqat mühbiri.

«Rusiye Qırım toprağında öz menfaatlarını esaslamaq içün kontseptsiyasını qurmağa tırışa, kerçek temelden (tarihiy – QA) belli bir parçanı alıp taşlay. Rusiye onı çıqarıp, mında istegen er şeyni qura bilecegini tüşüne. Rusiye içün bu parça er daim qırımtatar halqı olğan edi: onıñ şekillenüvi, devletçiligi, Qırım hanlığınıñ qomşuları ile munasebetleri», – dedi Çubarov.

Onıñ aytqanına köre, bu siyaset Rusiyede «bir qaç asır evelsi başlap, bugünki vaqialarğa (Rusiyeniñ Qırım ilhaqından soñ – QA) qadar devam etti».

Kyivde mayısnıñ 7-nde Qırımnıñ yarımada işğalinden evel ve soñ «Rusiye imperiya ceetinden» yerinen bağlı tögerek masa ötkerildi.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG