Rusiye, advokatlardan işğal etilgen Qırımda taqip etilgen Ukraina vatandaşlarını qorçalağanları içün intiqam ala. Böyle bir fikirni Ukraina halq deputatı, Qırımtatar Milliy Meclisiniñ reisi Refat Çubarov Qırım.Aqiqat Radiosında bildirdi. O, Rusiye Adliye nazirliginiñ Emil Kurbedinovnı «Qırımnıñ merkeziy advokatlar kollegiyası» erkânından çıqarmaq planlarını izaatladı.
Çubarov, bu talapnı «tamamen qanunsız» sayıp, Rusiye, işğal altındaki Qırımda öz qanunlarını qanunsız bir şekilde qullana, dep hatırlattı.
«Emil Kurbedinovnıñ siyasiy mabüs olğan Ukraina vatandaşlarınıñ imayecisi olaraq faaliyetini imkânsız yapqan areketlerniñ sebeplerini aytacaq olsaq, şunı añlamaq kerek ki, Rusiye işğalci memleket olaraq işğal şaraitlerinde Ukraina vatandaşlarını qorçalamağa cesaret etken er bir uquqçıdan intiqam ala. Mında tek Emil Kurbedinov içün degil, «Qırımnıñ merkeziy advokatlar kollegiyasına» kirgen diger advokatlar içün de aqibetleri ola bile», – dedi Çubarov.
Onıñ qayd etkenine köre, advokatlarğa açıq-açıq basqı yapacaqlar, ve «olar ne qadar cesür olsa da, yapqan areketleri sıñırlı olacaq».
Rusiye Adliye nazirligi, qırımlı advokat Emil Kurbedinovnı 2019 senesi martnıñ 1-ne qadar «Qırımnıñ merkeziy advokatlar kollegiyasından» çıqarmağa talap etti.
Qırımlı advokat Emil Kurbedinovnıñ fikirince, Rusiye Adliye nazirliginiñ onı «Qırımnıñ merkeziy advokatlar kollegiyasından» çıqarmaq talabı oña ve diger zenaatdaşlarına yapqan işleri sebebinden basqı ola.
