Qırımtatar muhtariyetine dair qanun leyhasınıñ qabul etilüvi yañı saylanğan doquzıncı çağırılış Ukraina Yuqarı Radasınıñ semereli işine bağlı olacaq. Böyle fikirni Qırımtatar Milliy Meclisiniñ reisi Refat Çubarov Qırım.Aqiqatqa bildirdi.
«Parlament semereli çalışıp başlaycaqmı, er şey buña bağlı. Ukrainanıñ yerini bütün tış siyaset yönelişlerinde ve ukrain cemiyeti içinde birlikni quvetleştirip olsa, bir mania körmeyim», – dedi Çubarov.
Onıñ aytqanına köre, qırımtatar muhtariyeti bütün Ukrainağa kerek.
«Şunı añlamaq kerek ki, laf qırımtatarlar ve Qırım aqqında ketmey, daa çoq Ukraina aqqında aytıla. Ve bu qararlarnı qabul etken Ukraina devleti Qırım yarımadası üzerindeki suverenitetini ğayrıdan tiklev mevamlarını quvetleştire», – dep qoştı o.
Daa evel haber etilgeni kibi, Ukraina prezidenti Volodımır Zelenskıynıñ avgustnıñ 9-nda qırımtatar halqınıñ vekillerinen kerçekleştirgen körüşüvinde qırımtatar muhtariyeti meselesi muzakere etildi. Bu aqta qırımtatar halqınıñ milliy lideri Mustafa Cemilev Qırım.Aqiqatqa tarif etti.
2014 senesi martnıñ 20-nde Ukraina Yuqarı Radası qırımtatarlarnı Qırımnıñ tamır halqı dep tanıdı. Bu qararğa 283 halq deputat rey berdi. Ukraina qırımtatar halqınen diger milliy azlıqlarnıñ Ukrainanıñ tamır halqı olaraq etnik, medeniyet, til ve din kimliginiñ saqlap qalması ve inkişafını kefil olmaqta.
2018 senesi dekabr ayında prezident Petro Poroşenko Ukraina devleti terkibinde qırımtatar milliy-territorial muhtariyetiniñ qurulmasınen bağlı Anayasa deñişmeleri qanunını Yuqarı Radağa kirsetmege azır olğanını bildirgen edi. Aynı vaqıtta, prezidentniñ aytqanına köre, o vaqıt parlamentte bu qararnı qabul etmek içün 300 rey olıp olmağanına dair malümatı yoq edi.
Ukraina haber siyaseti naziriniñ birinci muavini Emine Ceppar qırımtatar muhtariyetiniñ «separatizmge iç bir alâqası yoq» dep añlatqan edi. Onıñ qurulması ise Ukrainanıñ 2014 senesi qoşulğan BM tamır halqlarnıñ aqlarına dair beyannamesinde qayd etilgen tamır halqnıñ aqqı ola.
