Yuqarı Rada saylavlarından soñ Ukraina topraq bütünliginiñ ğayrıdan tiklenmesini ve ilhaq etilgen Qırım ve işğal etilgen Donbas regionlarınıñ Kyiv kontroli altına qaytarılmasını tezleştirmek içün bütün siyasiy küçler birleşmeli, dep bildirdi Qırımtatar Milliy Meclisiniñ reisi, parlament saylavlarında Ukraina telükesizlik hızmetiniñ sabıq reisi İgor Smeşkonıñ «Küç ve namus» firqasınıñ cedvelleri boyunca iştirak etecek Refat Çubarov Qırım.Aqiqat Radiosınıñ yayınında.
Refat Çubarovnıñ qayd etkenine köre, Qırım ve Donbasnıñ işğal etilgen topraqları üzerinde Ukraina kontroli temin etilse, «7 million insan rastkelgen yüzlernen ağır problemni al etmege kerek qalmaycaq».
«Em Qırımda, em de andan ketmege mecbur olğan insanlarnıñ onlarnen ve yüzlernen problemini er kün çezmege tırışa bilemiz. Amma Rusiyeniñ yarımada işğali devam etse, bu problemlerniñ qıyınlığı ve sayısı artacaq. İşğal – insanlar içün bahtsızlıq, repressiya, ayırım ve bir çoq diger zorluq çıqaracaq bir generator kibi», – dedi Çubarov.
İyülniñ 21-nde Ukrainada keçirilecek parlament saylavlarında 2014 senesinden soñ ilhaq etilgen Qırımdan esas Ukrainağa köçmege mecbur olğan siyasetçi, cemaat faalleri iştirak etecek. Qırımtatar Milliy Meclis reisi Refat Çubarov saylavlarda Ukraina telükesizlik hızmetiniñ sabıq reisi İgor Smeşknonıñ «Küç ve namus» firqasınıñ cedvelleri boyunca iştirak ete.
Ukraina Yuqarı Radasına firqa cedvelleri boyunca Qırımtatar Milliy Meclisiniñ beş vekili namzet kösterecek: qırımtatar halqınıñ lideri Mustafa Cemilev ve Meclis reisiniñ muavini Ahtem Çiygoz (Petro Poroşenkonıñ «Avropa birdemligi» firqası), Meclis reisi Refat Çubarov (İgor Smeşkonıñ «Küç ve namus» firqası), Gayana Yüksel (Ukrainanıñ yeşiller firqası), Qırımtatar Milliy Meclisiniñ azası ve Abmecit Suleymanov («Ukraina Halq Areketi»).
Yuqarı Rada saylavlarına tek Qırımtatar Milliy Meclisiniñ temsilcileri namzet köstermey. Olarnıñ arasında – ukrain jurnalisti ve qırımtatar asıllı devlet erbabı, Ukraina informatsion siyaseti naziriniñ birinci muavini Emine Ceppar («Ğroysmannıñ ukrain strategiyası» firqası), Qırımtatar Milliy Qurultayınıñ delegatı Rustem Umerov, «KrımSOS» teşebbüsiniñ koordinatorı Tamila Taşeva ve «VostokSOS» hayriye fondunıñ icra müdiri Aleksandra Dvoretskaya (üçü de Svâtoslav Vakarçuknıñ «Ses» firqasından), qırımlı bloger ve dizayner Liza Bogutskaya (Volodımır Zelenskıynıñ «Halq hızmetçisi» firqası), qırımlı, Ukrainanıñ sabıq halq deputatı Andrey Sençenko («Aq küçü»), cemaat faali, göñülli, Qırımdan köçken Natalya Lütikova («Ukraina Halq Areketi»).
