Noyabrniñ 12-nde Kyivde keçirilgen VI çağırılış Qırımtatar Milliy Qurultayınıñ delegatları konferentsiyasına 76 delegat keldi, dep bildirdi teneffüste Qırım.Aqiqatqa Qırımtatar Milliy Meclisiniñ reisi, Ukraina halq deputatı Refat Çubarov.
Onıñ qayd etkenine köre, «Qırımdan çıqqanda manialarğa oğrağan» delegatlarnıñ çoqusı işbu konferentsiyanıñ qararlarına esaslanacaq.
Çubarovnıñ aytqanına köre, eñ yaqın vaqıtta Qırımtatar Milliy Meclisi, saylavlarnı keçirmege imkân olmağanı içün «Qırım işğali şaraitlerinde vekâletlerini qaldıramağan» Qurultay delegatlarına «vazifelerine devam etip-etmeyceklerini qarar almağa» imkân berecek mehanizmni belgileycek.
Refat Çubarov, Qurultay delegatı vazifelerini eda etemeycekler «pek az olacağından» emin.
Bundan evel Qırımtatar Milliy Qurultayı Merkeziy saylav komissiyasınıñ reisi Zair Smedlâyev Qırım.Aqiqatqa bildirdi ki, VI çağırılış Qırımtatar Milliy Qurultayı delegatlarınıñ konferentsiyasına işğal etilgen Qırımdan bazı iştirakçiler yarımadada basqığa oğramaq telükesi bar olğanı içün kelip olamaycaq. Onıñ aytqanına köre, keçken sene Qurultay delegatlarınıñ esas Ukrainağa kelmesi Qırımdaki basqınıñ sebebi olğan edi.
Qurultay delegatları demokratik saylavlarnı keçirmege imkân peyda olğanına qadar vazifelerini eda etmege devam eteceklerMustafa Cemilev
Aqımdaki sene Qurultay delegatlarınıñ vekâlet müddetleri bite. Qırımtatar milliy lideri Mustafa Cemilevniñ Qırım.Aqiqatqa bildirgenine köre, «işğal şaraitlerinde Qurultay delegatlarınıñ demokratik saylavlarını keçirmege imkân yoq», şu sebepten Kyivdeki Qurultay delegatlarınıñ konferentsiyasında olarnıñ delegat vekâletlerini uzatma meselesi baqılacaq. Onıñ aytqanına köre, Qurultay delegatları demokratik saylavlarnı keçirmege imkân peyda olğanına qadar vazifelerini eda etmege devam etecekler.
Reglamentke köre, Qurultaynıñ 250 delegatı saylanmaq kerek. 2013 senesi keçirilgen saylavlarda 248 delegat saylanğan edi, eki yer Özbekistan içün ayırılğan edi, amma anda saylavlar olmadı. 2013 senesinden soñ bir qaç insan vefat etti, amma Qurultaynıñ Merkeziy saylav komissiyası aktual cedvellerni şimdilik derc etmedi.
Qırımtatar Milliy Meclisiniñ reis muavini İlmi Ümerovnıñ Qırım.Aqiqatqa bildirgenine köre, 248 Qurultay delegatından altı insan vefat etti ve bir kişi ğayıp oldı.
Kyivde VI çağırılış Qırımtatar Milliy Qurultayı delegatlarınıñ konferentsiyası keçirile. Tedbirge 200 iştirakçiden ziyade keldi.
Birinci Qırımtatar Milliy Qurultayı 1917 senesi noyabr ayında saylanğan edi. 1917 senesi dekabrniñ 9-ndan 26-na qadar esas qırımtatar qanunlarını qabul etken milliy tesis toplaşuvı olaraq çalışqan edi.
1991 senesi Qırımtatar Milliy Qurultayı faaliyetini yañıdan başlattı. Ukrainada qırımtatarlarnıñ yuqarı temsil organı olaraq tanıldı. Qırım işğalinden soñ Rusiye onıñ faaliyetini yasaq etti.
