Qırımtatarlarnı OSCE Ukraina ve Donbas vaziyetini al etüv Üç taraflı bağ gruppasındaki mahsus vekili Martin Sajdikniñ Qırım lafları açuvlandırdı.
Böyle fikirni oktâbrniñ 9-nda Qırımtatar Milliy Meclisiniñ reisi Refat Çubarov Kyivdeki matbuat konferentsiyasında bildirdi, dep haber ete Qırım.Aqiqat mühbiri.
«Tünevin qırımtatarlardan çoq cevap aldım. İnsanlarnı bu beyniñ (Martin Sajdik – QA) tarihqa subyektiv baqması açuvlandırdı… Tarihnı aytmağa başlağan soñ ne içün ileri ketmeysiñ? 1783 senesi Rusiye Qırımnı ilk sefer ilhaq etkenini ne içün aytmaysıñ? Qırımtatarlarnıñ devletçiligi zorbalıq qullanılıp yoq etilgen edi», – dedi Çubarov.
Çubarov, Kyiv, Sajdikniñ laflarına cevap bermeli, dep ayttı.
«Ukrinformnıñ» oktâbrniñ 7-nde bildirgeni kibi, Avstriyadaki forumda Sajdik Rusiyeniñ qanunsız Qırım ilhaqınen bağlı fikrini aytmaqtan vazgeçip böyle ayttı: «Pensiyada olsam, yani serbest insan olsam, Qırım mevzusını da izaatlaycam».
Daa soñra Sajdik Qırım meselesinde «tarafsızlığını» köstermek içün kene sözge çıqtı. Qırım aqqında aytmasa da, anda bulunğanlar Sovetler Birligi vaqtında yarımada 30 yıl «Rusiye Federatsiyasınıñ terkibinde» olğanını, daa 37 yıl – 1954 senesinden 1991 yılına qadar – Ukraina Sovet Sotsialistik Cumhuriyetinde, bundan evel ise «Rusiye imperiyası bar olğanını» bilmek kerek, dedi.
Forumda iştirak etken Ukraina Avstriya elçisi Oleksandr Şçerba Sajdikniñ bu fikrine şaştı.
Qırımtatar Milliy Meclisiniñ reisi Refat Çubarovnıñ fikirince, Sajdik «Rusiyeniñ qanunsız Qırım ilhaqını aqlağan subyektiv tarih baqışlarını bildirdi».
Qırımnıñ Rusiye yolbaşçısı Sergey Aksenov Martin Sajdikniñ Qırım laflarını begendi.
