Qırımtatar Milliy Meclisiniñ reisi Refat Çubarov aprel 9-10 künleri Oraza bayramında qırımlı siyasiy mabüslerniñ qorantalarını ziyaret etmege çağırdı. Bu aqta o Facebook saifesinde yaza.
Elbette, er biriñiz bu vazifeni nasıl yerine ketirecegini ve Oraza Bayramı künleri qaysı qorantalarnı ziyaret etecegini özüñiz qarar alacaqsıñız. Men ise, sizlerge muracaat etmek imkânından faydalanıp, aziz semetdeşlerim, Oraza Bayramı künleri Qırım siyasiy mabüsleriniñ qorantalarını ziyaret etmek, olarnıñ balaları ve esli-başlı ana-babalarına qol tutmaq çağıram", - dep qayd etti o.
Şu cümleden, Çubarovnıñ bildirgenine köre, Rusiye mahkemesi tarafından 12 ve 16 yılğa azatlıqtan marum etilgen "Qırım musulmanları davası" mabüsleri Üzeir ve Teymur Abdullayevlerniñ anası Dilâra Ablâliyeva balalarına baracaq.
Meclis reisiniñ aytqanına köre, Qırımnıñ tahminen 200 sakini Rusiye akimiyeti tarafından qanunsız sürette azatlıqtan marum etildi ve Rusiye Federatsiyasınıñ eñ uzaq koloniyalarına etap etildi.
"İnşAllah, kelecek Oraza Bayramı künlerinde ve ondan soñraki künlerde, Qırım siyasiy mabüsleriniñ er bir qorantası, Rusiye işğalcilerinden zarar körgen insanlar, diqqatımız ve destegimiznen sarılacaq", - dep qoştı Çubarov.
Aprelniñ başında Qırımtatar Resurs Merkezi, 2024 senesi mart ayında Rusiye quvetçileri Qırımda 11 tintüv keçirip, 26 insannı yaqaladı, olardan 12-si qırımtatar, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
