Qırımtatar faali, Herson vilâyetindeki Novoalekseyevka qasabasınıñ sakini Edem Bekirov dekabrniñ 12-nde Aqmescitteki Rusiye FSBsiniñ binasına alıp ketirildi, qabaatı aydınlatıldı.
Bu aqta Qırımtatar Milliy Meclisiniñ reisi, Ukraina halq deputatı Refat Çubarov Facebookta yazdı.
«Şimdi belli oldı ki, Edem Bekirov Aqmescitteki Rusiye FSBsiniñ binasına ketirildi, Rusiye işğalcileri tayin etilgen advokat yanında oña qabaatını aydınlattı. Edem Bekirovğa qayda bulunğanını ömür arqadaşına telefonda haber etmege imkân berildi», – dep qayd etti Çubarov.
Çubarovnıñ daa evel bildirgenine köre, Bekirov Qırım kirişinde Rusiye uquq qoruyıcıları tarafından tutuldı. Siyasetçiniñ aytqanına köre, 1961 senesi doğma Edem Bekirov Herson vilâyetindeki Novoalekseyevka qasabasınıñ sakinidir. O, 78 yaşında anasını ve aqrabalarını ziyaret etmek içün Qırımğa ketti.
Al-azırda Rusiye uquq qoruyıcıları tarafından bunı isbatlaycaq bir malümat ve Ukraina tarafınıñ cevabı yoq. Qırım.Aqiqat adiseniñ tafsilâtlarını ögrene.
Noyabrniñ 15-nde qırımtatar faali Zair Smedlâyev bildirdi ki, Qırım ve esas Ukraina arasındaki memuriy sıñırda Rusiye uquq qoruyıcıları qırımtatar faalleri Lenora Dülber ve Nariman celâl, Qurultay delegatı Lemmar Yunusov ve Qurultaynıñ sabıq delegatı Mustafa Asabanı tutıp aldı. Birazdan Dülber yiberildi.
Rusiye uquq qoruyıcıları bunı izaatlamadı. Bir qaç saattan soñ faaller çıqarılıp yiberildi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
