Qırımtatar Milliy Meclisiniñ reisi Refat Çubarov qırımlılar içün yañı 2021 senesiniñ hayırlavını videoğa çıqardı. O, Ukraina devletine sadıq qalmağa ve bir-birine qol tutmaq içün birleşmege çağırdı.
«Sayğılı vatandaşlar, ürmetli ana-babalar, ablalar, ağalar, genç qardaşlar! Birlikte yaşağanımız 2020 yıl tarihqa keçe. Keteyatqan yıl epimiz içün qolay olmadı. Elbette, halqımız bugün yaşağan bütün sıqıntılarnıñ, facialarnıñ ve acılarnıñ sebebini çoq yahşı bile. Bu sebep – 7 yıldır devam etken Qırımnıñ rus işğali. Qırım ana-yurtumıznı rus işğalcilerinden qurtarılması Qırımtatar Milliy Meclisiniñ, qırımtatar milliy areketiniñ faalleriniñ, bütün halqımıznıñ faaliyetinde birinci sıradadır… Keteyatqan sene rus işğalcileri tarafından adaletsiz ve aqsız apislerge atılğan soydaşlarımıznı iç unutmadıq ve olarnıñ azat etilmesine areketler alıp bardıq ve devam etemiz. 2021 senesi apiste olğan soydaşlarımızğa ve olarnıñ qorantalarına, ana-babalarına, balalarına, ömür arqadaşlarına baht künler ketirir», – dedi Çubarov.
O, yañı 2021 senesi milliy zafer yılı olsun, dep tiledi.
«Milletimiz halq olaraq bu basamaqlardan da keçer. Çünki uzun sürgünlikte baba-dedelerimiz adalet yolundaki küreşte böyle sınavlarda keçe bildiler. Emin oluñız, biz aqlımız, milliy duyğularımız, din ve tilimiz bizlerni daa ziyade birleştirsin. Qırımtatarı olaraq özara bir-birimizge daa ziyade yaqın olayıq. Vatanımız Qırımda yañı milliy qorantalar tizilsin. Çoq balalı ana-babalar, sağlam ve oqumış evlâtlarımız halqımıznı daa ziyade sevindirsin. Biz beli bükülmegen, cesür ve adalet küreşinde qaviyleşken halqnıñ torunları olğanını unutmadıq ve kimsege unuttırmamız. Cümlemizge kelgen yıl hayırlı közaydınlarnen kelsin. 2021 yılı milliy zafer yılı olsun!», – dep tebrikledi Meclis reisi.
Ukraina prezidenti Volodımır Zelenskıy yılbaş gecesi yapqan çıqışında Qırım ve işğal altındaki Lugansk ve Donetsk vilâyetleri rayonlarınıñ sakinlerine muracaat etip, olarnı «Yañı yılnı beraber qarşılamağa» çağırdı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
