Qırımtatar Milliy Meclisiniñ reisi Refat Çubarov Rusiye işğal etken Qırımnıñ sakinlerini 2019 Yañı yılınıñ kelmesini Kyiv saatına köre qarşılamağa çağırdı. Bu aqta o, Facebooktaki saifesinde yazdı.
«Vaqtınca işğal etilgen Qırımda yaşağan er biriñizni 2018 senesi dekabrniñ 31-nde Kyiv saatına köre saat 24.00-da 2019 senesiniñ kelmesini soqaqqa ya da azbarğa (balkon, sofa) çıqıp, petarda, hlopuşka, bengal ateş yaqıp qayd etmege çağıram. Bilesiñiz ki, Moskva saatına köre Qırımnıñ soqaqları ve azbarlarına tek sarhoş işğalciler çıqacaq», – dep yazdı Çubarov.
Rusiye işğal etken Qırımda ve Donbasnıñ işğal etilgen qısmında Moskva saatı qullanıla.
Yarımada işğalinden soñ Qırımnıñ bir çoq sakini Yañı yılnı Kyiv saatına köre qarşılay.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
