Qırımtatar Milliy Meclisiniñ reisi, Ukraina halq deputatı Refat Çubarov qırımlılarnı yarımadada siyasiy mabüslerniñ mahkemelerine kelmege çağırdı.
Bunı o, oktâbrniñ 21-nde Facebook saifesinde yazdı.
«Qırımda yaşağan er bir semetdeşimiz siyasiy mabüslerge ve qorantalarına yardım etmeli. Onlarnen qırımtatarı Rusiye işğalcileri tarafından apiske alındı ve siyasiy mabüs ola, vaqtınca işğal etilgen Qırımda yaşağan er bir semetdeşimiz qaramanlarğa ve ailelerine yardım ete bile», – dep yazdı siyasetçi.
«Cinayetçi rus işğalcileri halqına, toprağına ve devletine sadıq qalğan, qorantalarını sevgen ve semetdeşlerini ürmet etken insanlarnı mahküm etken mahkemelerge keliñiz. Rusiye işğalcileriniñ apishanelerinde tutulğan qardaşlarımız boysunmay, çünki Yüce Allahqa inana ve azatlıqta olğan epimizden eminler», – dep qoştı Çubarov.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
