Qırımtatar Milliy Meclisiniñ reisi Refat Çubarovnıñ bildirgenine köre, Rusiye kontrolindeki Qırım Yuqarı mahkemesi baqqan cinaiy davanıñ üç «zarar körgen insanı» qanunsız areket yapmağa çağırmağanını ayttı.
Bu aqta Çubarov Qırım.Aqiqatqa tarif etti.
«Advokatımnıñ (tayin etilgen Aleksandr Osokin – QA) aytqanına köre, zarar körgenler insanlarnıñ ayatına telüke ketirecek bir de bir areketlerge çağırmağanımnı ayttı. Aksine zıddiyetniñ farqlı taraflarından insanlar bir-birini tiymesin dep, ayat yapmağa (2014 senesi fevralniñ 26-nda miting vaqtında – QA) tırışqanımnı ayttı. Tek bir «zarar körgen» kişi parmaqlarnen bir işaret köstergenimni ayttı», – dep bildirdi Çubarov.
Çubarovnıñ qayd etkenine köre, advokatnıñ malümatına köre, Rusiye mahkemesiniñ oturışuvında dört «zarar körgen» insan sorğuğa çekildi.
Meclis reisi Rusiye akimiyeti tarafından tayin etilgen «devlet advokatı» Aleksandr Osokin ile bağlanıp, o (advokat – QA) bilgileri çerçivesinde advokat vazifelerini yapacağına esaslanacaq, dep ayttı.
«Amma o «davamnı» izaatlap olamay. Bütün izaatlarım mende qala. O (advokat – QA) razı oldı ve ileride bir intervyü olmaycaq, dep tüşünem», – dedi Çubarov.
Aleksandr Osokinniñ mahkemede aytqanına köre, Çubarovnıñ «qabaatını tanımağanına» esaslanacaq. Qırımda Meclis reisini ğıyabiy şekilde mahkeme eteler.
Aqmescitte iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
Bu sene mart ayınıñ soñunda Rusiye Tahqiqat komiteti Qırımtatar Milliy Meclisiniñ reisi Refat Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212 maddesiniñ 1-inci qısmı (qalabalıqlarnı teşkil etüv), 280.1 maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq faaliyetke açıq çağıruv) açıldı.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Aktsiya mayısnıñ 3-nde keçirilecek edi. Koronavirus pandemiyası sebebinden yürüş başqa vaqıtqa qaldırıldı.
