Link açıqlığı

Saatnıñ esas haberi

Çubarov Qırımdaki Hıdırlez aqqında: büyükligi qabartıldı, devlette çalışqanlarnı toplağanlar


Refat Çubarov, arhiv fotoresimi
Refat Çubarov, arhiv fotoresimi

Qırımtatar Milliy Meclisiniñ reisi Refat Çubarov emin ki, Qırımnıñ Rusiye akimiyeti teşkil etken Hıdırlez bayramında musafirlerniñ rekord sayısı aqqında bergen malümatı qabartıldı. Bu aqta o, Qırım.Aqiqatqa ayttı.

«İşğalci akimiyet tarafından Hıdırlez keçirilmesi soñki yılları qırımtatarlarnıñ iç olmağanda bazı tedbirlerge kütleviy qoşulmasını köstermek ıntıluvlarına çevirildi. Bu sene, faallerniñ qayd etkenine köre, işğalci akimiyet keçirgen Hıdırlez iştirakçilerge köre eñ küçük oldı. Er vaqıttaki kibi, anda devlette çalışqanlarnı toplağanlar», – dep qayd etti Çubarov.

Meclis reisiniñ aytqanına köre, Hıdırlez büyük umum Qırım bayramından bir rayonda keçirilgen tedbirge çevirildi.

«Daa bir propagandacı tedbir, Rusiye Federatsiyasınıñ Qırım işğalinden evelki emiyeti qırımtatarlar içün yoq. 55 biñ – qabartılğan raqam. Bir qaç biñ insan aqqında laf kete edi, dep tüşünem. Teşkilâtçılar Hıdırlez keçirilgen alannı kösterecek foto ve videolarnı aydınlatmay», – dep ayttı Çubarov.

Hıdırlezge Herson vilâyetinden musulmanlar kütleviy şekilde keldi kibi Qırımda aydınlatılğan malümatnı Çubarov «olmaycaq şey» dep adlandırdı, çünki Herson vilâyetiniñ Geniçesk rayonında qırımtatar bayramı munasebetinen tedbir keçirildi.

Bundan evel Rusiye Devlet dumasınıñ işğal etilgen Qırım deputatı Ruslan Balbek yarımadada Rusiye akimiyeti mayısnıñ 4-nde teşkil etken Hıdırlez qırımtatar bayramına 55 biñden ziyade insan keldi, dep bildirdi. Bayramğa kelgen musafirlerniñ sayısını Balbek rekord dep adlandırdı.

Esas Ukrainada da mayısnıñ 4-nde Hıdırlez bayramı qayd etildi, dep bildire «İRS-Geniçesk» media merkezi. Arabat belindeki Sçastlivtsevo köyüniñ park alanında kontsert, yarışlar, qırımtatar milliy küreş yarışları teşkil etildi. Bayram musafirleri pilâvnen sıylandı.

Hıdırlez – türkiy halqlarnıñ eñ büyük bayramlarından biri. XIX asırda onıñ şeñlikleri üç kün devam ete edi.

Qırımnıñ ilhaqından soñ Qırımtatar Milliy Meclisiniñ vekilleri yarımadada yapılğan Hıdırlez şeñliklerinde iştirak etmekten vazgeçti. Ondan ğayrı olar, Rusiye tarafından ilhaq etilgen Qırımda bulunğan yurtdaşlarını da böyle şeñliklerde iştirak etmekten vazgeçmege davet ettiler.

XS
SM
MD
LG