Qırımtatar Milliy Meclisiniñ reisi Refat Çubarov qırımlılarnı telükesizikni temin etmek içün azırlıqlar körmege çağırdı. Çubarov yarımadada soñki vaqıtları yüz bergen patlavlarnı izaatlar eken o farqlı yollarnen azat etillecegini qayd etti.
"Bütün bular Qırım azat etilecegini köstere. Qırım cebe yanındaki topraq olğanını er kes añlay. Biz de bunıñ aqqında aytamız ve olarnı Qırım türlü yollarnen azat etilecegine azırlanmağa çağıramız. Öz ve yaqınlarınıñ telükesizligini temin etmek içün azırlıqlar körmege çağıramız", - dep bildirdi o.
Onıñ sözlerine köre, Qırımğa kelgenlerniñ sayısı bayağı eksilgen, işğalciler ise bunı gizlemege tırışalar.
Soñki eki afta devamında Qırımda Rusiye ordusınıñ obyektlerine ücüm etilmeden sadece eki kün keçti, dep bildirdiler "QırımSOS" uquq qoruyıcı teşkilâtında.
Ukrayina Milliy telükesizlik ve mudafaa şurasınıñ kâtibi Oleksiy Danılov Ukrayina telükesizlik hızmetiniñ (SBU - UTH) Keriç köpründeki patlavlarğa alâqasını tasdıqladı.
İyülniñ 17-nde saba Qırımnıñ Rusiye yolbaşçısı Sergey Aksönov Keriç (Qırım) köpründe areket toqtatıldı, dep bildirdi. Onıñ aytqanına köre, Rusiyeniñ Krasnodar ülkesi tarafından 145-inci dayaq fevqulâde adise oldı.
Ukrayina Mudafaa nazirliginiñ Baş istihbarat idaresiniñ spikeri Andriy Yusov Keriç köpründeki «fevqulâde adiseni» izaatlamağa istemedi. «Tek Ukrayina Mudafaa nazirligi Baş istihbarat idaresiniñ reberi Kırılo Budanovnıñ «Qırım köprü – artqaç bir inşaat» degen laflarını tekrarlamaq mümkün», – dep ayttı o.
RBK-Ukrayına menbalarına esaslanıp, Qırım köpründe olğan zararlar – Ukrayına Silâlı quvetleri ve Telükesizlik hızmetiniñ Arbiy-deñiz quvetleriniñ mahsus operatsiyasıdır, dep bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
