Qırımda 113 bala Rusiye uquq qoruyıcılarınıñ areketleri neticesinde babasız qaldı. Böyle balalarnıñ sayısı ep arta, dep ayttı oktâbrniñ 29-nda Kyivde Qırımtatar Milliy Meclisiniñ reisi Refat Çubarov. O, qırımlı balalarnıñ babaları aqqında ikâyelerni toplağan «Babam – qaramandır» bükletiniñ taqdim merasiminde çıqışta bulundı.
Onıñ aytqanına köre, yarış teşkilâtçıları Qırımda babasız qalğan balalarğa qoltutmağa istedi.
«Qırımda insanlar apiske alınğanda eñ çoq balalar zarar köre… Bizim balalarımız babaları ne içün qaraman olğanını añlamaq kerekler. Olar eyilik, adalet, Qırım toprağı, qırımtatar tili, qırımtatar halqı, yaşağan Ukraina içün küreşip qaraman olalar», – dep qayd etti Refat Çubarov.
Qırımtatar Milliy Meclisiniñ reisi «Bizim balalar» hayriye vaqfınıñ faaliyeti aqqında hatırlattı. Fond babaları siyasiy sebeplerden apiske alınğan 100-den ziyade balağa yardım ete. Çubarov, Ukraina ükümetiniñ siyasiy mabüsler ve qorantalarına yardım qararnamesi aqqında da ayttı.
Oktâbrniñ 29-nda Kyivde Rusiyeniñ Qırım işğalinden soñ Rusiye uquq qoruyıcıları tarafından babaları tutulğan balalarnıñ ikâyeler cıyıntığı taqdim etildi. «Babam – qaramandır» adlı büklet inglizce Qırımtatar resurs merkezi ve Qırımtatar Milliy Meclisiniñ yardımınen neşir etildi.
«Bizim balalar» hayriye vaqfınıñ malümatına köre, 100-den ziyade qırımtatar balası babasınıñ vasiyligini körmey, babaları siyasiy sebeplerden apiske alınğan edi.
Aq qorçalayıcılarnıñ qayd etkenine köre, 60-tan ziyade Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum qaldı. Ukraina Tış işler nazirligi anda tutulğan ukrainalılarnı azat etmek talabınen Rusiyege 300-ge yaqın narazılıq notasını yollağan edi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
