2014 senesi fevral-mart aylarında Qırımdaki Moskva patriarhlığınıñ Ukrain pravoslav kilsesiniñ ibadethanelerinde rusiyelilerge silâ tarqatıla edi.
Bu aqta Qırımtatar Milliy Meclisiniñ reisi, halq deputatı Refat Çubarov ukrain telekanallarından biriniñ yayınında bildirdi.
Siyasetçi, bunı Ukraina Pravoslav kilsesiniñ avtokefaliyasına başqa din vekilleriniñ celp etilmesini izaatlap tarif etti.
«Belki de, böyle bir şey aytmaz edim, amma Rusiye istilâsınıñ ilk künleri Qırımda Moskva patriarhlığınıñ Ukrain pravoslav kilselerinde silâ saqlanğanını özüm kördim, Krasnodar ülkesinden (Rusiye – QA) insanlar anda kele edi. Anda forma kiyip, silâ alğan ediler», – dep qayd etti Çubarov.
Onıñ qayd etkenine köre, bu Moskvadan ukrain kilsesine dos-doğru emir kelgenini isbatlay edi. Çubarov, Ukrainanıñ diniy merkezlerinde diger devlet menfaatlarınıñ qorçalavına qarşı çıqtı.
Ukraina telükesizlik hızmeti, Rusiye 2014 senesi Qırımnı işğal etmezden evel Moskva patriarhlığınıñ vekillerini istihbarat içün qullandı, dep bildirgen edi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
