2016 senesi Qırımda hırsızlanğan Ervin İbragimovnıñ bulunğan yerini Rusiye FSBsi ve Qırımdaki Rusiye FSBsiniñ idaresi bilmek kerek, dep ayttı Qırım.Aqiqatqa Qırımtatar Milliy Meclisiniñ reisi Refat Çubarov.
Çubarovnıñ fikirince, qırımtatar faali, Dünya qırımtatar kongressiniñ icra komitet azası Ervin İbragimov sağ qala.
«Onıñ sağ olğanına ve bir yerde tutulğanına ümüt etemiz. Amma böyle deşetli areketlerniñ sebeplerini iç añlap olamayıq. Ervin İbragimovnı aytsaq, işğal etilgen Qırımda FSBni idare etken Palagin (2016 senesi Qırımda Rusiye FSBsiniñ İdare yolbaşçısı Viktor Palagin – QA) bilmek kerek, dep aytmağa isteyim. O, belli bir plannı yerine ketirgen insan ola bile, yaş qırımtatarlar hırsızlanğan edi, olarnıñ arasında Ervin İbragimov da bar», – dedi Çubarov.
Onıñ aytqanına köre, İbragimovnıñ ğayıp olması narazılıqlarnı eksiltecek, yarımadada qırımtatarlarnı qorquzacaq edi.
«Ervin İbragimov kibi soyları endi yañı qırımtatar nesili ola, olar qırımtatar milliy areketine faal sürette kirgen ediler. Olarnıñ bilgileri bar edi, olar oquy ve bizler onıñ kibi insanlarğa ümüt ete edik… Cezalandırıcı organlar ve mahsus hızmetler, olarnıñ fikirince, büyük insan gruppalarına tesir etecek areketler yapqan ediler», – dep tüşüne Meclis reisi.
Viktor Palaginniñ Qırımtatar Milliy Meclis reisiniñ aytqanlarını açıq sürette izaatlamadı.
Bağçasarayda 2016 senesi mayısnıñ 24-nde aqşam şeer şurasınıñ deputatı, Dünya Qırımtatar Kongressi icra komitetiniñ azası Ervin İbragimov hırsızlanğan edi. Onıñ maşinası yol ortasında tapıldı. Ğayıp olğan kişi mayısnıñ 25-nde Meclis azalarınen beraber Sudaqqa baracaq edi, anda qırımtatar faalleriniñ mahkemesi planlaştırılğan edi.
Qırımtatar faali Nariman Celâl tutulğanını video nezareti kameraları qayd etti, dep bildirdi. Video uquq qoruyıcı organlarına berildi.
«Videoda, onı körgenlerniñ aytqanlarına köre, yol patrul hızmetiniñ urbasında insanlar bar, olar Ervin İbragimovnı toqtatıp, maşinadan alalar ve diger avtobusqa mindireler, ondan soñ ise keteler», – dep aytqan edi Celâl 2016 senesi.
Daa soñra Ervin İbragimovnı Bağçasarayda tutuv videosını kütleviy haber vastaları derc etti.
Ğayıp olğan insannıñ babası yarımadanıñ Rusiye prokuraturasına ariza berip, oğlunı qıdırmağa rica etti.
Qırım Muhtar Cumhuriyetiniñ prokuraturası Ervin İbragimovnıñ ğayıp olmasınen bağlı mahkemeden evel tahqiqat keçirmekte.
Qırım aq qorçalayıcı gruppası İbragimovnı Rusiye akimiyeti ya da onıñ kontrolindeki gruppalar hırsızladı, dep tahmin ete.
Kyivde Ervin İbragimovnıñ ğayıp olğanını hatırlatmaq içün er ay «Ervin qayda?» aq qorçalayıcı aktsiyaları keçirilmekte.
