Qırımtatar Milliy Meclisiniñ reisi Refat Çubarov Rusiye prezidenti Vladimir Putinniñ amerikalı bloger ve FOX News telekanalınıñ sabıq jurnalisti Taker Karlsonğa bergen intervyüsına cevap berdi.
"Yañı bir şey yoq, amma bu adamnıñ zaten hasta olğanını daa bir kere añladım. Çünki öz aqlını isbatlamaq içün bazı usullarnı qullanmağa tırışmaq pek maniakaldir; işte bu tarihta özgün ekskursiyalar, er kesni Rusiye bu cinayetlerni yapmağa mecbur olğanını qabaatlamaq (ancaq cinayet olğanını aytmay). Bizler endi bir qaç kere eşitken şeylerniñ episi", - dep qayd etti Meclis reisi Qırım.Aqiqatqa bergen izaatında.
Çubarovnıñ fikrince, "onı diñleycek auditoriyanıñ büyük qısmı içün bu yañı bir şey olacaq, olar buña inana bileler, amma mında endi mesüliyet jurnalistke aittir".
Onıñ fikrince, bu intervyü qırımlılarnıñ dünyabaqışına tesir etmeycek.
''Yoq, o, zaten onı ürmet etken "Putinistler"niñ fikirlerini tasdıqlaycaq. Şimdi Qırımda böyle insanlar az, çünki insanlar cebedeki topraqlarda yaşay. Rusiye ordusınıñ kirsetilüvini alğışlağanlarnıñ çoqusı Qırımnı iqtisadiy problemler ya da Rusiye ordusına askerlikke alınmamaq içün terk etmege mecbur oldılar. Bu intervyü daa çoq Amerika seyircisi içün. Bu Trump-Biden arasındaki siyasiy zıddiyetke tesir etüv aleti ola", - dep qayd etti Çubarov.
ISW analitikleri, Rusiye prezidenti intervyüni ğarbiy auditoriya içün informatsion operatsiya olaraq qullanğanına ve Rusiyeniñ Ukrayinağa qarşı tecavuzını aqlağanına ve Rusiyeniñ Ukrayinadaki cenkni muzakereler vastasınen toqtatmağa istegenine inana.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
