Qırımtatar Milliy Meclisiniñ reisi Refat Çubarov işğal etilgen Qırımda da keçirilgen Rusiye Anayasasınıñ tüzetüvlerine rey berüvni izaatlap, onı «taqlit» dep adlandırdı ve 2014 senesi yarımadada olıp keçken «referendumnen» qıyasladı.
«Bu rey berüv – bir taqlittir… Bu tüzetüvler Rusiye Anayasasına endi kirsetildi, ve Devlet duması ve Federatsiya şurası buña endi rey berdi, dep daa bir kere aytmağa isteyim. Amma Putin halq razılığını berse, o vaqıt olar işke tüşürilecek, dep ayttı. Ebet, halq razı olur – çünki o (Rusiye akimiyeti – QA) bunı kösterir, yazar. 2014 senesi martnıñ 16-nda «Qırımdaki referendum» taqliti de öyle olğan edi. O vaqıt olacaq raqamnı evelden ayttıq, öyle de çıqtı», – dep bildirdi Çubarov Facebookta.
Meclis reisi qomşu Rusiye tarafından işğal etilgen Qırımda Anayasa tüzetüvlerinen bağlı rey berüvniñ keçirilüvini «qanunsız ve cinaiy» dep adlandırdı.
Hatırlatamız, Keriçte Rusiye Anayasasınıñ tüzetüvlerine mesken evlerniñ azbarlarında rey bereler.
Daa evel berilgen malümatqa köre, Qırımnıñ Rusiye akimiyeti köy sakinleri içün rey berüv qutularını ketire.
Rusiyede iyünniñ 25-nde Anayasa tüzetüvlerine rey berüv başlandı. O, iyülniñ 1-ne qadar devam etecek. Bunıñ içün Rusiyede 96,5 biñ saylav bölügi ve dünyanıñ 144 memleketinden 254 bölük açıldı.
Anayasa tüzetüvlerine rey berüv Rusiye işğali altındaki Qırımda da keçirile.
Tüzetüvlerniñ tek episine rey bermek mümkün: ya episine qol tutasıñ ya da episine qarşı çıqasıñ. Vladimir Putinniñ prezident yıllarını sıfırlandırmaqnen beraber rusiyelilerge rus tili statusını «devlet şekillendirici halqnıñ tili» olaraq belgilemege, Tañrını hatırlamağa ve federal topraq yapmaq imkânını qoşmağa, «Vatan imayecileriniñ qaramanlığını küçültmege» yasaqlamağa teklif etile – umumen 206 tüzetüv ve doğruluv.
