Qırımtatar Milliy Meclisiniñ reisi Refat Çubarov «hırsız ve aydut» Vladimir Putinni «cinayet işlegen» işğal altındaki Qırım çeke, dep ayttı. Bu şekilde Çubarov Rusiye prezidentiniñ martnıñ 18-nde yarımadağa kelmek niyetini izaatladı.
«Halqara cinayetçi, hırsız ve aydut Putin yarın tuvğan toprağımda dolaşacaq, men anda 1716 künden berli adım atıp olamayım. Putin işlegen cinayetleri içün ceza alacağını añlağan cellât kibi özüne yer tapıp olamay», – dep yazdı Çubarov Facebook saifesinde.
Onıñ qayd etkenine köre, yüz biñlernen qırımlı qoranta Putinniñ adını «daa bir kere qarğalaycaq».
«Rusiyeniñ Qırım işğali beş yıl devam ete, hırsızlanğan onlarnen insan ve öldürilgen qırımtatarlar, qanunsız şekilde azatlıqtan marum etilgen yüzlernen qırımtatarı ve ukrain, yoq etilgen tarihiy yadikârlıqlar, yarımadanıñ tamır halqı – qırımtatarlar – ve etnik ukrainler Qırımdan quvula, yarımada askeriyleştirile, unikal tabiat obyektleri viran etile ve Qırım ekologik ceetten kirletile – Putinni Halqara mahkemeniñ mahkümleri skemlesine ketireceklerniñ tek bir qısmı», – dep qoştı Çubarov.
Rusiye prezidenti Vladimir Putin martnıñ 18-nde işğal etilgen Qırım ve Aqyarnı ziyaret etmege planlaştıra. Putin Aqmescitte Qırım ve Aqyar cemaatçılığınıñ vekillerinen körüşip, Qırım ve Aqyar ilhaqınıñ beşinci yılına bağışlanğan merasimlerde iştirak etecek.
Putin Avropa Birliginiñ sanktsiyalarına baqmadan Siemens turbinaları ile qurulğan Balıqlava issilik elektrostantsiyasınıñ ve video konferentsiyası vastasınen Taman issilik elektrostantsiyası ve Tamandaki «Port» ast stantsiyasınıñ işke tüşürilmesinde iştirak etmege planlaştıra.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
