Ukrainanıñ beşinci prezidenti Petro Poroşenko Qırımtatar Milliy Meclisiniñ reisi Refat Çubarovğa Yuqarı Radada qırımtatar muhtariyetini qabul etmek içün rey yetmeyceginden ve bu ğayeni itibardan tüşüre bileceginden qorqqanını bildirgen edi. Bu aqta Çubarov Qırım.Aqiqatqa tarif etti.
«Vazifemniñ soñunda Petro Poroşenkodan Ukraina prezidenti olaraq bu qanun leyhasını parlamentke ne içün çıqarmağanını ögrenmege tırıştım. Diger deñişmeler olğanda rey berüv tecribesine baqıp, bizler bu leyha etrafında reylerni nasıl birleştire bilecegimizge baqtıq», – dedi Çubarov.
«O, (Poroşenko – QA) da israrlı olsa, biz ise işdeşlerimiznen elimizden kelgeni qadar çalışsaq, eñ azından, 226 reyni talap etken birinci rey berüv temin etilecek, dep aytqan edim», – dedi Qırımtatar Milliy Meclisiniñ reisi.
Çubarov, qanun leyhası Radada ne içün rey berüvge çıqarılmadı sualini Poroşenkonıñ özüne bermek kerek, dep qoştı.
«Baqmadılar, çünki prezident Poroşenko onı kirsetmege cesaret etmedi. Bunı ne qadar samimiy olıp yapmağanı – oña (Poroşenkoğa – QA) berilecek bir sual, mence)», – dedi o.
Prezident Zelenskıynıñ inauguratsiyası ögüne Ukrainanıñ beşinci prezidenti Petro Poroşenko Ukraina Yuqarı Radası mustaqil Ukraina terkibindeki qırımtatar muhtariyetine dair deñişmelerni Ukraina Anayasasına kirsetmeli, dep ayttı. Zelenskıynıñ inauguratsiyasından soñ Poroşenko qırımtatar meselesini açıq sürette izaatlamağan edi.
2018 senesi dekabr ayında prezident Petro Poroşenko Ukraina devleti terkibinde qırımtatar milliy-territorial muhtariyetiniñ qurulmasınen bağlı Anayasa deñişmeleri qanunını Yuqarı Radağa kirsetmege azır olğanını bildirgen edi. Aynı vaqıtta, prezidentniñ aytqanına köre, o vaqıt parlamentte bu qararnı qabul etmek içün 300 rey olıp olmağanına dair malümatı yoq edi.
Ukraina haber siyaseti naziriniñ birinci muavini Emine Ceppar qırımtatar muhtariyetiniñ «separatizmge iç bir alâqası yoq» dep añlatqan edi. Onıñ qurulması ise Ukrainanıñ 2014 senesi qoşulğan BM tamır halqlarnıñ aqlarına dair beyannamesinde qayd etilgen tamır halqnıñ aqqı ola.
