Qırımtatar Milliy Meclisiniñ reisi Refat Çubarovnıñ fikirince, resmiy Kyiv Qırım işğaliniñ altıncı yılına kerekli kibi cevap bermedi. Bu aqta o, martnıñ 19-nda Qırım.Aqiqatqa ayttı.
«Ukraina devletiniñ rolü halqara esnaslarnıñ lokomotivi olğanına baqılsa, Ukrainanıñ resmiy akimiyeti tarafından tam signallar seslendirilmeli. Em halqara toplulıqqa, em de işğalci memleketke qarşı. Bu olmadı, ve bu canımıznı ağırttı. Kyivde soñki vaqıtları büyük diqqat ayırılğan lafta dialoglarnı devam ettirmek içün Kremlni açuvlandırmağa istemegenlerini köstere bile. Başqa bir sebep, ne yazıq ki, tapamayım», – dedi Çubarov.
Onıñ aytqanına köre, Ukraina Qırımnıñ qanunsız Rusiye ilhaqı aqqında dünyağa hatırlatmaq içün «bütün manaçıqlarnı» qullanmalı.
Martnıñ 18-nde Ukraina Tış işler nazirligi, prezident Vladimir Putinniñ Qırım Muhtar Cumhuriyeti ve Aqyar şeeri ziyaretinen bağlı narazılığını Rusiye nazirligine bildirdi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
