Qırımtatar Milliy Meclisiniñ reisi Refat Çubarov ve Kanada Cemiyetler palatasınıñ deputatı James Bezan Qırımnı işğalden qurtarmaq içün platforma qurulışını muzakere ettiler. Bu aqta Bezan Facebook saifesinde yazdı.
«Deputat Refat Çubarovnen körüşip, Qırımnı ve onı işğalden qurtarmaq içün platforma qurulışını muzakere etmege memnün oldım», – dep qayd etti Bezan.
O, Çubarovnı Kanadanıñ muhalifet Konservativ firqası qırımtatarlarnıñ küreşine qoltuta, dep işandırdı.
«Konservativ firqa Qırımda yaşap, Putin rejiminiñ repressiyalarına oğrağan qırımtatarlar ve ukrainlerge qoltuta, dep bildirdim», – dep aytıla yazısında.
Ukraina prezidenti Petro Poroşenko cumaertesi künü, aprelniñ 6-nda, Kyivde ukrainalı faallernen körüşip, Qırımnıñ işğalden qurtuluv strategiyasını, Ukraina Anayasasınıñ deñişmelerini ve yarımadadan köçip kelgenlerniñ integratsiyasını muzakere etti.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
