Qırımtatar Milliy Meclisiniñ reisi Refat Çubarovnıñ fikirince, Qırımdaki Rusiye akimiyeti artıq «advokatlarnı da tutıp almağa başladı». Bu fikrini o, Qırım.Aqiqatqa qırımlı advokat Emil Kürbedinovnıñ tutulmasını izaatlap bildirdi.
«Onı ekstremizmde şeklep tutıp alğanlar. Añlağanımız kibi, saifeleri (içtimaiy ağlarda – QA) aqqında laf kete. O, (Kürbedinov – QA) böyle vaziyette endi olğan edi ve onı tutqan ediler. Añlaymız ki, endi advokatlarnı da tutıp alalar. Olarnı apiske almaq ve taqip etmek içün manaçıq qıdıralar. Añlaşıla ki, bugünde-bugün advokatlar insanlarğa itibarını saqlamağa, işğalci rejimge qarşı turmağa yardım etken bir küç», – dedi Çubarov.
Onıñ aytqanına köre, onıñ tutulması qırımlı advokatlar arasında soñkisi olmaması mümkün.
Dekabrniñ 6-nda Qırımda Rusiyeniñ Ekstremizm ile küreş merkeziniñ hadimleri advokat Emil Kürbedinovnı tutıp aldı.
Jurnalist Anton Naumlükniñ malümatına köre, Kürbedinov Rusiye Memuriy cinayetler kodeksiniñ 20.3 maddesi boyunca (natsist işaretleri ya da timsalleri, ekstremist teşkilâtlarnıñ işaretleri ya da timsalleri, ya da federal qanunlarnen yasaqlanğan işaret ve timsalleriniñ teşviqatı ve açıq numayış etilmesi) şeklene.
Rusiyeniñ Ekstremizm ile küreş merkeziniñ hadimleri ve üyken prokuror Valentin Çuprina Emil Kürbedinovnı ekstremizm ve terrorizm qanunları bozulamaz, dep tenbiyelegen edi.
Oktâbrniñ 27-nde Aqmescitte keçirilgen «Qırım birdemliginiñ» toplaşuvına Rusiye prokuraturasınıñ vekilleri ve kimligi belli olmağan maskalı insanlar, em de politsiya hadimleri keldi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
