Qırımtatar Milliy Meclisiniñ reisi Refat Çubarov bildirdi ki, 2013 senesi Qurultayda saylanğan halq delegatları işine devam etecek. Bunı o, Facebook saifesinde derc etilgen video muracaatında ayttı.
Çubarov hatırlattı ki, 2013 senesi oktâbrniñ 26-nda Aqmescitte VI çağırılış Qırımtatar Milliy Qurultayınıñ birinci sessiyası olğan edi.
«5 yıldan soñ Qurultaynı toplap, yañı saylanğan delegatlarğa vekâlet bermek kerek. Amma, belli olğanı kibi, Rusiyeniñ Qırım işğali sebebinden al-azırda serbest saylavlarnıñ keçirilmesi imkânsızdır. Rusiye Milliy Meclis faaliyetini yasaq etti, şunıñ içün 2013 senesi Qurultayda saylanğan halq delegatları işine devam etecek», – dep tarif etti Meclis reisi.
Haber etile ki, 2018 senesi noyabrniñ 12-nde Kyivde Qırımtatar Milliy Qurultay delegatlarınıñ konferentsiyası olacaq. Onıñ devamında Qırım işğali, qırımtatar halqınıñ vaziyetinen bağlı eñ aktual meseleler baqılacaq, beyanat ve muracaatlar qabul etilecek.
«Allahqa şükür, 2013 senesi saylanğan 248 insandan tek küçük bir grupp Qırım işğalinden soñ Qurultaydan çıqtı. Meclis azaları arasında da bir qaç kişi işğalge qoltutqanı içün azalıqtan çıqarıldı. Amma, Allahqa şükür, Qurultay delegatları ve Meclis azalarınıñ ekseriyeti vazifesini yapmağa devam ete. Epimizge muvafaqiyetli ve semereli iş tilep, Qırımnıñ tezden serbest olmasını isteyim», – dedi Çubarov.
Birinci Qırımtatar Milliy Qurultayı 1917 senesi noyabr ayında saylanğan edi. 1917 senesi dekabrniñ 9-ndan 26-na qadar esas qırımtatar qanunlarını qabul etken milliy tesis toplaşuvı olaraq çalışqan edi.
1991 senesi Qırımtatar Milliy Qurultayı faaliyetini yañıdan başlattı. Ukrainada qırımtatarlarnıñ yuqarı temsil organı olaraq tanıldı. Qırım işğalinden soñ Rusiye onıñ faaliyetini yasaq etti.
