Qırımtatar Milliy Meclisiniñ reisi Refat Çubarov Rusiye «işğalci memleket» olaraq «yapqan cinayetleri içün mümkün olğanı qadar çoq ceza çekmeli», dep ayttı. Bu aqta o, Qırım.Aqiqat Radiosınıñ yayınında bildirdi.
«Qırım Rusiye işğalcisi içün mümkün olğanı qadar paalı olsun dep er şey yaptıq. Soñki yıllar Rusiyeniñ yarımadağa masraf etken büyük resurslarını köstere… Suv berilmekten vazgeçüv işğalcilerniñ ayatını qıyınlaştırmaqnen beraber ekologik vaziyetke de tesir etkenini añlaymız. Amma eki devlet arasında cenk olsa, bir çoq insannıñ telükesizliginen bağlı meseleler bir tarafnen – yani Rusiyenen – ültimatum şeklinde çezilmemeli. Putin ve diger siyasetçiler yolbaşçılığında Rusiye devleti ültimatum qoyıp, em ğarp siyasetçileri, em Ukraina devletini tiz çökmege mecbur etecek ola», – dep bildirdi Çubarov.
Esas Ukraina angi şartlarnen Qırımğa suv bere bile sualine Çubarov «tek bir şart bar – Qırımnı işğalden qurtaruv planı masada olmalı, basamaq, tarih, Rusiye ordularını çıqaruv tertibini körmek kerekmiz», dep cevap berdi.
«Tek dos-doğru muzakereler. Suv – işğal bitken soñ ya da eñ azından işğalden qurtaruv esnasında», – dep ayttı Qırımtatar Milliy Meclisiniñ reisi.
Ukraina Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminley edi. 2014 senesi Rusiye Qırımnı işğal etken soñ, yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
Ukraina Yuqarı Radasına firqa cedvelleri boyunca Qırımtatar Milliy Meclisiniñ beş vekili namzet kösterecek: qırımtatar halqınıñ lideri Mustafa Cemilev ve Meclis reisiniñ muavini Ahtem Çiygoz (Petro Poroşenkonıñ «Avropa birdemligi» firqası), Meclis reisi Refat Çubarov (İgor Smeşkonıñ «Küç ve namus» firqası), Gayana Yüksel (Ukrainanıñ yeşiller firqası), Qırımtatar Milliy Meclisiniñ azası ve Abmecit Suleymanov («Ukraina Halq Areketi»).
Yuqarı Rada saylavlarına tek Qırımtatar Milliy Meclisiniñ temsilcileri namzet köstermey. Olarnıñ arasında – ukrain jurnalisti ve qırımtatar asıllı devlet erbabı, Ukraina informatsion siyaseti naziriniñ birinci muavini Emine Ceppar («Ğroysmannıñ ukrain strategiyası» firqası), Qırımtatar Milliy Qurultayınıñ delegatı Rustem Umerov, «KrımSOS» teşebbüsiniñ koordinatorı Tamila Taşeva ve «VostokSOS» hayriye fondunıñ icra müdiri Aleksandra Dvoretskaya (üçü de Svâtoslav Vakarçuknıñ «Ses» firqasından), qırımlı bloger ve dizayner Liza Bogutskaya (Volodımır Zelenskıynıñ «Halq hızmetçisi» firqası), qırımlı, Ukrainanıñ sabıq halq deputatı Andrey Sençenko («Aq küçü»), cemaat faali, göñülli, Qırımdan köçken Natalya Lütikova («Ukraina Halq Areketi»).
