Qırımtatar Milliy Meclis reisi Refat Çubarov, 7 yıl evel bu künü Qırımnıñ Rusiye işğaline qarşı plakatlarnen çıqqan bir qaç biñ qadın, olarnıñ balaları ve qorantaları aqqında unutmamağa çağırdı.
«Bugün bile, 2014 senesi martnıñ 8-nde Qırımnıñ Rusiye işğailne qarşı qırımtatar ve diger milliyet vekilleri qadınları tarafından keçirilgen kütleviy zorbalıqsız aktsiyanı qadınlarnıñ fedakârlığı ve cesürligi köstergen nümünelerinden biri kibi sayam», – dep yazdı Çubarov.
Çubarovnıñ sözlerine köre, bu qadınlarşu şaraitte öz vazifesini eda ettiler, yani, bütün dünyağa «Rusiye Qırımğa silâlı istilânı başlağanını» kösterdiler.
«Qırım qadınları barışıq içün» cemaat areketi 2014 senesi martnıñ başında Rusiye ordusı Qırımğ basıp kirgeninen peyda oldı. Birinci aktsiya martnıñ 3-nde Boğurça qasabasında olıp keçti.
Eñ büyük aktsiya 2014 senesi martnıñ 8-nde oldı. O zaman Halqara qadın-qızlar kününde Milliy Meclis teşebbüsinen Qırım boyunca qadınlarnıñ iştiraginen kütleviy aktsiyalar olıp keçti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
