Qırımtatar Milliy Meclisiniñ reisi Refat Çubarovnıñ fikirince, işğal şaraitlerinde Qırımğa Dnipro suvını bermege razı olacaq akimiyet uzun vaqıtqa qalıp olamaycaqtır. Bu aqta o, Qırım.Aqiqat Radiosınıñ yayınında ayttı.
«Suv meselesini aytsaq, daa bir kere hatırlatmağa isteyim: Qırım ealisine suv yete. O, hocalıq faaliyeti, arbiy garnizonlar, arbiy gemiler içün yetmey. Aynı vaqıtta Rusiye repressiya ve taqip yolunen qırımtatarlarnı, etnik ukrainlerni yarımadadan quvıp, anda öz vatandaşlarını ketirmege tırışa. Yüzlernen yañı evge, ebet, infrastruktura ve suv kerek. Buña Dnipro suvını bermeycekmiz», – dedi Çubarov.
Onıñ qayd etkenine köre, «yarın Şimaliy-Qırım kanalınıñ bentinde şlüzlerni açmağa emir etecek er angi akimiyet, er angi siyasetçi iş odalarında çoq qalmaycaq – halq quvar». O, «soñki Rusiye askeri yarımadadan ketken künü» Dnipro suvı Qırımğa ketecek, dep qoştı.
«İşğal şaraitlerinde, Qırımnıñ vaziyeti qayd etilmeyip, suv berilse, Ukraina toprağınıñ ketmesine ve Rusiye ilhaqını qabul etmesine razılıq bar olğanını kösterecek. Bu Ukraina dezintegratsiyasınıñ başlanğıçı olacaq», – dedi Çubarov.
İyünniñ 11-nde Qırımnıñ Rusiye yolbaşçısı Sergey Aksenov Taygan suv anbarını Aqmescitniñ suv teminlevi sistemasınen vaqtınca birleştirecek suv boruları Rusiyeden Qırımğa keldi, dep bildirgen edi. İyülniñ 8-nde berilgen malümatqa köre, yaqın suv anbarlarınıñ yedeklerinde Aqmescit içün 110 künge suv qaldı.
Rusiye kontrolindeki Qırım yolbaşçısı Sergey Aksenovnıñ bildirgenine köre, 2020 senesi 150 yıl içinde eñ qurğaq oldı. Qırımnıñ Rusiye ükümetiniñ reisi Yuriy Gotsanük bildirgenine köre, yarımada esas Ukrainadan Şimaliy-Qırım kanalı üzerinden Dnipro suvınıñ berilüvine muhtac degil.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
