Ukraina halq deputatı, Qırımtatar Milliy Meclisiniñ reisi Refat Çubarov, Rusiye prezidenti Vladimir Putin ve Türkiye prezidenti Recep Tayyip Erdoğan Rusiye ve Qırımda siyasiy sebeplerden tutulğan mabüslerniñ azat etilüv meselesini muzakere eteceklerine ümüt beslemekte.
Bu fikirni Çubarov Qırım.Aqiqat mühbiriniñ Türkiye ve Rusiye prezidentleriniñ ilân etilgen körüşüvinen bağlı sualine cevap berip bildirdi.
«Türkiye Cumhuriyeti ve Rusiye Federatsiyasınıñ tarafları arasındaki körüşüvde ukrainalı siyasiy mabüsler ve diger meseleler muzakere etileceginden şübelenmeyim. Bundan evel de öyle olğan edi. Erdoğan ve Putin, Lavrov ve Çavuşoğlu (Rusiye ve Türkiye Tış işler nazirleri – QA) körüşüvlerinde de», – dedi Çubarov.
Yanvarniñ 3-nde Türkiye prezidenti Recep Tayyip Erdoğan Türkiye Tış işler nazirine gemilerniñ Keriç boğazından keçmesi ve Rusiye tarafından zapt etilgen ukrain arbiy gemileriniñ keri qaytarılması meselesini bütün platformalarda kötermege vazife berdi.
Ukraina prezidenti Petro Poroşenko yanvarniñ 5-nde İstanbulda Türkiye prezidenti Recep Tayyip Erdoğan ile körüşip, Rusiye apishanelerinde tutulğan ukrainalı siyasiy mabüslerniñ azat etilüvini, işğal etilgen Qırımda insan aqları bozulğanını muzakere etti.
