Belarustaki vaziyet Qırım ile Ukrainnanıñ territorial bütünligini ğayrıdan tiklemek içün bir şanstır. Bunı Facebook saifesinde qırımtatar milliy meclisi reisi Refat Çubarov yazdı.
Çubarovnıñ fikrince, Rusiye prezidenti Vladimir Putin Belarus prezdenti Aleksandr Lukaşenkoğa "yardım etmemege olamaz".
"Lukaşenko, Belarusta halq narazılıqlarını bastırmaq içün Putinden yardım sorağanı şübesizdir. Putin yardım etmemege olamaz. Amma yardım etmege de qorqa, alev Rusiyeniñ özüne keçe bile", - saya Çubarov.
Onıñ fikrince, ihtimallı "Rusiye ordularınıñ Belarus territoriyasına kirsetüvi halqara munasebetlerde yañı, daa büyük burhanğa sebep olur". Amma Çubarov, "adiselerniñ böyle inkişafı Ukrainanıñ Qırım ile territorial bütünliginiñ ğayrıdan tiklenmesine şans ola bile" dep saya.
"Ukraina şimdi AB memleketleri, Büyük Britaniya, AQŞ ve Kanada liderlerine konkret halqara tedbirlerniñ paketini teklif etmeli", - yazdı Çubarov.
Kreml, Rusiye ve Belarus prezidentleri cumaertesi künü telefondan laf etkenlerini tasdıqladı. Qayd etile ki, Vladimir Putin ve Aleksandr Lukaşenki Belarusta prezident saylavlarından soñ olğan vaziyetni muzakere etti.
Belarusta avgust 9-ından berli saylav falsifikatsiyalarına ve militsiya zorbalığına qarşı kütleviy narazılıq aktsiyaları keçe. Olarnıñ iştirakçileri Lukaşenkonıñ ketmesini istey. Aktsiyalarda onlarca biñ adam iştirak ete - sadece Minskte degil, amma başqa şeerlerde de.
Газ, пули, кровь: ОМОН жестко разогнал протесты в Беларуси (фоторепортаж)
