Qırımtatar Milliy Meclisiniñ reisi Refat Çubarov qırımlı Volodımır Baluh ve Edem Bekirovnıñ Ukrainağa qaytqanlarını tebriklep, olarnen körüşecegini bekley.
«Volodımır Baluh ve Edem Bekirovnıñ azat etilüvini telefonda tebrikledim. Em Volodımır, em Edem olarnıñ azat etilüvinde iştirak etken, olarğa ve qorantalarına qoltutqan er keske minnetdarlıq bildirmege rica etkenler. Olarğa Rusiye işğalcileriniñ yapqanlarından soñ Vatanda muvafaqiyetli reabilitatsiyası olmasını ve Qırımtatar Milliy Meclisinde tez vaqıtta körüşüv olacağını bekleyim», – dep yazdı Çubarov Facebookta.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı.
Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız alda tuta. Olarnıñ arasına 2018 senesi noyabr ayında Qara deñiz yalısı yaqınlarında Rusiye tarafından zapt etilgen 24 ukrainalı deñizci ve Donbastaki esirler kirmemekte.
