Keçken 2018 senesi «Qırımnıñ işğalden qurtarılmasına atılğan adımlardan biri» oldı, dep ayttı Ukraina halq deputatı, Qırımtatar Milliy Meclisiniñ reisi Refat Çubarov Qırım.Aqiqat Radiosınıñ yayınında.
Onıñ bildirgenine köre, bu yıl Ukrainanıñ diger ükümetler, devletler ile ortaqlığı pekitildi, halqara toplulıq ise Rusiyege olğan munasebetini belgiledi.
Refat Çubarov dekabrde qabul etilgen BM Baş assambleyasınıñ Qırım qararlarını hatırlattı, anda Azaq deñiziniñ askeriyleştirilüvi ve Qırımdaki insan aqları vaziyeti meselesi köterilgen edi.
«BM aza devletleri öz reylerinen Ukrainağa qoltutıp, Rusiyeni istilâcı olaraq tanıdı. 2018 senesi eki qararnen belgilendi. Diger halqara meydançıqlarda sert qarşılıqlar bar edi. Avropa Şurası Parlament assambleyasını hatırlayıq: Rusiyege faal sürette iştirak etmege bermediler, azalığını toqattılar, üç yıldan berli Rusiye onı yañıdan tiklemege tırışa. 2018 senesi bunı yapmağa imkânı olur degen qorqu bar edi. Artıq açıq olğan küreşke Avropa Şurasındaki eñ yüksek seviyeniñ memurları kirsetilgen edi», – dedi Çubarov.
2018 senesi dekabrniñ 18-nde BM Baş Assambleyası Qırım, Qara ve Azaq deñizleriniñ askeriyleştirilüvinen bağlı qararnı qabul etti. 66 memleket oña qoltuttı, 19-ı qarşı çıqtı, 72 devlet bitaraf qaldı.
BM Baş Assambleyası 2018 senesi dekabrniñ 22-nde aqşam işğal etilgen Qırımda insan aqları vaziyetine dair qararnı qabul etti, vesiqada ukrainalı siyasiy mabüsler Oleg Sentsov, Volodımır Baluh ve Emir-Üsein Kukunıñ adı bar edi.
BM Baş assambleyasınıñ Rusiye işğal etken Qırım ve Donetsk ve Lugansk vilâyetleriniñ işğal altındaki rayonlarına dair qararı fevralniñ soñunda baqılacaq, dep tarif etti BM Ukraina vekili Volodımır Yelçenko.
