Ukrainada Çornobıl atom elektrostantsiyasınıñ felâketi aqqında “Çornobıl” serialı, üç çıqarılğan seriyasından soñ, IMDB reytinginde TV-seriallar arasında eñ yüksek basamaqnı qazandı.
“Taht oyunları” bitkeninden soñ, çoqusı dey: “Çornobıl”nı baqmağance, HBO-ğa abuneñizni lâğu etmeñiz”, - dep yaza Forbes matbuatınıñ közeticisi Paul Tassi, dep bildire “Amerika sesi”niñ ukrain hızmeti.
Öz maqalesinde Forbes, seyircilerniñ tefsirlerine esaslanıp, bugüngece çıqarılğan bütün seriallarnıñ reytingini köstere:
1. «Çornobıl» (9,7 – 52000 rey).
2. «Zemin seyyaresi II» (9,5 – 71000 rey).
3. «Silâ arqadaşları» (9,5 – 317000 rey).
4. «Zemin seyyaresi» (9,4 – 147000 rey).
5. «Breaking bad» (9,4 – 1200000 rey).
6. «Taht oyunları» (9,4 – 1500000 rey).
“Bilmeyim, üç epizodğa köre, “Çornobıl” evel çıqarılğanlardan eñ güzel şou, dep aytmaq mümkünmi, - dey Tassi, - amma bu kino yapıcılıqnıñ şaşıracaq yönelişi olğanı şübesizdir”.
Bu film aqiqiy vesiqalı vaqialarğa esaslanğan ve olarnı pek yahşı çektiler, dep közetici.
Yazıq ki, bu serial qısqa - tek beş seriyası çıqarılacaq. Ve o tarihiy vaqialarğa esaslanğan olğanından sebep, seyirciler ne qadar istese de, ekinci mevsimi olmaycaq.
1986 senesi aprelniñ 26-nda Çornobıl atom elektrik stantsiyasınıñ dördünci energoblokunda küçlü himik patlav oldı. Neticede reaktor blokunıñ bir qısmı ve maşina odası yoq etildi.
Patlav neticesinde yanğın çıqtı, alev üçünci energoblokunıñ damına keçti. Aman-aman birden qaza yerine yanğıncılar keldi. Alevni saba saat 5-ke qadar söndüre ediler. Lâkin dördünci bloknıñ içinde onı ancaq mayısnıñ 10-nda söndürip oldılar, o vaqıt grafitniñ büyük qısmı endi yanğan edi.
Patlav ve yanğından soñ radioaktiv duman peyda oldı. O, tek zemaneviy Ukraina, Beyazrusiye ve Rusiye topraqlarını degil, bir çoq Avropa memleketi – İsveçiya, Avstriya, Norvegiya, Almaniya, Finlândiya, Yunanistan, Romaniya, Sloveniya, Litvaniya, Latviya topraqlarını qavrap aldı. Nükleer adiseleriniñ halqara şkalasına (INES) köre bu qaza yedinci derece telüke olaraq tasnif etildi.
